Den e mundo moderno cu nos ta bibando aden awendia, ta casi imposibel midi bon gobernacion y integridad sin mar’e na responsabilidad. Den mundo di maneho nan ta yam’e “accountability”. Mucho biaha comunidad ta midi politiconan y gobernantenan pa para responsablel pa maneho, pero poco biaha ta tene e directornan y hefenan di departamento responsabel pa nan decisionnan.
Den e caso na WEB Aruba NV, unda henter nos pais a sufri daño pa un fayo den nan sistema interno cu a causa un “blackout” ta casi imposibel pa imagina cu e asunto aki ta bay sin ningun hende asumi responsabilidad. “Minimo cabesnan mester lora”, asina un experto den maneho a subraya. El a bisa acerca cu tanten cu no responsabilisa ningun hende pa e fayo of erornan humano aki, nada lo no drecha y cu e tipo di scenarionan asina, unda comercio ta perde miyones, lo continua.
E percepcion den comunidad ta cu “nad’un ta pasa toch”. Pueblo ta sinti cu WEB por haci y deshaci pasobra nan tin monopolio, nan ta gobierno y nan tin e poder. Clientenan ta keda 10 ora sin coriente pero e cuenta ta bin mesun cos toch, ningun hende lo sinti e oranan perdi ey bek den nan recibo. Esunnan cu a perde artefactonan cu a kima, lo por claim na Elmar y mira si nan lo recompensa. Pero, esunnan cu a sufri daño financiero den negoshi, nan no tin ningun caminda pa bay.
Pa mas detaye riba e tema di “Accountability”, lesa e edicion di TREMPAN di awe.