E recuperacion di Aruba ta den nos man! Awo mas cu nunca tin pa sigui cuida nos mes, pa asina nos sigui maneha Covid-19 riba nos isla. Esaki ta e mensahe di Departamento di Salud (DVG) riba e prome dia di luna di october.
Durante e ultimo lunanan, e aumento di casonan a escala di manera significativo y esaki a trece cu ne diferente reto y obstaculo. Tambe el a conduci na diferente medida di proteccion un bez mas pero e resultado ta cu e casonan ta bahando. E medidanan hunto cu e disciplina y compromiso di nos comunidad, a logra baha e curva den forma significativo. Nos ta riba bon caminda, pero nos mester sigui cumpli pa persevera.
Departamento di Salubridad Publico Aruba por medio di e campaña aki kier encurasha y motiva comunidad completo pa sigui cumpli, sigui cuida y mantene un mentalidad positivo den e periodo aki. Nos ta conoci pa ta un pueblo cu curashi y determinacion pa logra cosnan grandi y hunto so nos por sigui hiba nos isla dilanti. Uni nos ta vence, dividi nos ta fracasa. P’esey invitacion pa nos tur sigui cuida nos mes, pa asina cuida otro. Uni nos lo ta mas fuerte pa resisti Covid-19, si nos sigui e recomendacionnan di Ministerio di Salud y DVG. Nos ta logrando y cu Positivismo, curashi, motivacion, determinacion, disciplina y AMOR PA NOS PAIS!
Nos lo persevera. Aruba ta conta cu bo! #ArubaTaContaCuBo #DVGAruba
