“Den e dianan aki tin hopi Arubiano/residente cu ta bolbiendo di exterior y ta haya nan mes den e situacion cu nan mester haci e test di Covid-19 na Aeropuerto. Algun pasahero local cu a bolbe no a gusta esaki of no ta acuerdo”, asina vocero di Crisisteam Covid-19 a informa un rato pasa.
Gobierno ta informa cu tur ciudadano cu ta biba na Aruba, sea Arubiano of residente cu biaha pa exterior, sea pa vacacion, trabao, salud of cualkier otro motibo, na momento cu bo ta prepara pa bolbe Aruba bo por haci e Covid-19 PCR test 72 ora prome cu vuelo. Si bo no a haci esaki, e ora lo bo mester haci e Covid PCR test na Aeropuerto. Pues no tin excepcion, sea bo ta turista of local. E virus tampoco ta haci distincion cua nacionalidad e ta infecta, tur hende e ta infecta.
Na momento cu un persona haya e resultado di su test haci na Aruba y e ta positivo, e mester isola su mes y tuma contacto cu su dokter di cas. Si e test sali negativo, ta consehabel pa toch keda cas pa algun dia pa observa di por si acaso bo tin sintoma cu ta mainifesta, asina bo ta proteha e famia na cas y otronan na trabao of unda cu bo bay.
E sintomanan por ta; keintura, tosamento, sinti curpa cansa, dolor di cabes, dolor di curpa (musculonan), diarea, dificultad pa hala rosea of rosea cortico, perdida di holor of smaak. Si bo a sinti algun di e sintomanan aki, isola bo mes na cas y tuma contacto cu bo dokter di cas y tambe informa bo famia y amistadnan.
Pa loke ta esnan cu ta bin di exterior pa keda na casnan di famia of amigo, si nan test sali negativo, ta conseha pa nan tambe keda algun dia na cas pa observa si tin sintoma ta manifesta. Ta sugeri pa evita mobilisa bo mes di biaha, di come na mesa hunto cu e famia durante prome dianan y tambe sinta combersa den grupo na cas sin tapaboca.
Practica e reglanan di higiena y distancia social pa asina bo proteha e mesun famia cu bo a bay keda cerca nan. Ta hunto y actuando cu responsabilidad y disciplina nos ta vence e pandemia aki di Covid-19.
