Instituto Biba Saludabel y Activo, IBiSA ta informa na publico cu su oficina principal situa na Frankrijkstraat 1, como tambe IBiSA SportCentrum San Nicolas situa na dr. Schaepmanstraat 52 na San Nicolas ta cera e aña aki durante dianan di fiesta di Pasco y Aña Nobo.
Ultimo dia di trabao pa e aña aki ta diabierna 15 di december 2017. Ambos oficina ta reanuda trabou riba diamars 3 di januari 2018 for di 7:30 a.m. pa brinda e acostumbrado servicio na publico.
Staf y personal di IBiSA ta gradici tur instancia, organisacion, compania, directivanan di scol, departamentonan gubernamental, medionan di comunicacion, prensa y comunidad di Aruba en general pa e apoyo brinda na nos institucion y na ‘Bus di Salud’ durante aña 2017. IBiSA ta spera di por sigui conta cu tur sosten y apoyo den aña 2018 pa promove un estilo di bida saludabel y activo riba nos isla. Despues di un aña hopi activo y exitoso pa Bus di Salud y actividadnan ‘Recreativo y Deportivo’, IBiSA ta tuma e oportunidad pa prepara y habri aña nobo cu e meta pa sigui duna e miho servicio na publico.
IBiSA ta desea tur empleado, nan famia y henter comunidad di Aruba un ‘Feliz Pasco, paz, amor y felicidad den cada hogar’. Expresando na mes momento, e miho deseonan pa Aña 2018 por yena di hopi bendicion, salud, prosperidad y hopi productividad. Y cu tur deseo bira realidad den e aña nobo.
