“Mañan merdia nos ta bay plat. No ta acepta e carta di Minister Ursell Arends y no sa ainda ni con tampoco unda lo protesta, esey ta dicidi mañan”, asina por lo menos un shopsteward di SEPPA den Arubus a sigura na nos despues di a publica e carta cu decision di gobierno pa no interveni mas den e disputa salarial den Arubus. Magali Brito a confirma cu tin reunion dialuna merdia pero tampoco a contesta si lo bay den welga y tampoco con.
E trahadonan ta sinti cu Gabinete Wever-Croes kier pone nan bou presion y mas bien ta purba intimida nan door di laga publica un carta pa bisa cu tur trahado mester debolbe e 750 florin cu a paga nan na december riba nan salario. Obvio mayoria trahado a uza e placa ey caba y no tin e mas, pues ta den debe awo cu compania pa pag’e bek, sea den un solo pago of den algun quota. “Pero bo no kier negocia, no kier duna nada pero kier kita di nos. Anto ta guera nos ta bay e ora”, segun un trahado a duna di conoce cu un tono di bos basta indigna.
E trahadonan ta para riba cu tur gobierno, di AVP, MEP, POR y RAIZ a para man crusa y a laga directornan sin preparacion di maneho sino simplemente nombra politicamente, caba cu e compania. A laga nan tuma decisionnan contra ley, na fabor di sponsornan di campaña pero no na beneficio di Arubus ora di compra di bus nobo, pero en bes di persigui nan, ta duna tur “golden handshake” y laga nan bay cas miyonario tambe como premio. Consecuentemente a sangra e compania y mand’e den un debe cu awo ta impagabel. “Pero t’ami tin culpa di esaki? T’ami a cumpra bus cu no ta sirbi? T’ami a laga nan hack nos cuent’i banco?”, asina e trahadonan ta puntra awo. Dicon ta corta net cerca nan pero no ta e directornan y e ministernan cu a permiti mal maneho tur e decadanan aki.
“Nos no kier tende. Mañan ta un pa tera of un pa lama. No por sigui wanta mas. Y net bon cu Su Mahestad Rey ta na Aruba….kisas nos por yega Bestuurskantoor mañan merdia cu 10 bus pa ofrece un keiro pa nos splic’e con corupcion ta cabando cu companianan estatal”.
