Manera ta custumber, Departamento di Agricultura, Cria y Pesca/Santa Rosa semper ta duna oportunidad na nos criadonan local pa cumpra crianan di rasa na momento cu esakinan ta disponibel.
E biaha aki nos tin diferente rasa di cabrito disponibel pa benta. E rasanan disponibel ta: Anglo Nubian, Boer Goat y tambe Toggenburg.
Mester remarca cu esnan cu por cumpra un of mas cabrito mester ta un criado di bestia activo cu tereno registra na su nomber. Orario pa cumpra bestia ta di dialuna te diabierna, prome cu 9’or di mainta. No ta posibel pa bay cu cabrito despues di e ora stipula. Motibo di e regla aki ta cu solo cayente ta pone cu e cabrito por sofoca di e calor cu consecuencianan di hasta morto durante su transportacion.
Otro exigencianan pa por cumpra cabrito ta e disponibilidad di un cura of luga adecuado pa aloca e bestia. E cura mester ta limpi y mester tin sombra pa e bestia por ta den fresco durante dia pa descansa. Mester percura pa e tin awa limpi alcansabel na tur momento pa e por bebe. Den caso cu no por cumpli cu e puntonan menciona, Santa Rosa ta reserva e derecho di benta di un of mas bestia. Pa mas inofrmacion por tuma contacto cu Santa Rosa su oficina na: 585-8102.
