Diahuebs ultimo, Aruba a conoce e prome doctorado di Papiamento, dr. Joyce Pereira na University of Curacao (UOC) cu su tesis titula “Valorization of Papiamento in Aruban society and education, in historical, contemporary and future perspectives”. Parlamentario Sue-Ann Ras (MEP) tambe tabata presente na e ceremonia na Corsou y tabatin e honor di experencia e momento historico aki.
Segun Sue-Ann Ras, for di momento cu a inicia e ceremonia, por a sinti un ambiente positivo, orguyo y felicidad di un lucha impresionante y contagioso di un dama profesional, den e area di educacion y Papiamento den e aula di Universidad. Pa prome biaha, e aula di e universidad tabata completamente yen y ainda tabatin hende para pafo cu no por a drenta. Mita di e aula, tabata di Aruba y mas cu claro, esey ta un indicacion fuerte, cu e momento aki, ta uno di hopi balor tanto pa Joyce como nos idioma Papiamento.
Contenido
E contenido di e tesis en general ta un compilacion di resultado di varios aña di investigacion di posicion di idioma Papiamento den sociedad y nos sistema educacional na Aruba. Meta di e defensa tabata pa contesta pregunta tocante e.o. actitud di hende na Aruba relaciona cu idioma, derecho di idioma, vision educacional y experiencia y respet pa propio identidad y tur esaki pa por formula y implementa un maneho di idioma cu ta cuadra mas miho cu e necesidad y aspiracion di e pueblo di Aruba.
“Loke mas a resalta pa mi, tabata ora e catedratico di ciencia huridico a haci e pregunta, cu si di berdad Joyce Pereira ta para tras di e ponencia cu ta un crimen si un mucha no ricibi enseñana den su propio idioma. Y sin pensa dos biaha, el a contesta esaki cu, si e ta un crimen! Mas cu claro, mi ta comparti e opinion aki cu dr. Joyce Pereira, paso e cifranan no ta gaña y ta refleha ki nivel di educacion nos hendenan tin na Aruba. Si djis analisa e cifra di mercado laboral di Censo 2010, a indica cu 69% di nos poblacion laboral ta LBO/MAVO of menos. Y solamente 12% ta riba un nivel di HAVO, VWO y WO”, Ras a bisa.
Reflexion y Emocion
Sin duda, hopi di esunnan presente por a biba y recorda varios momento emocional. Incluso hopi por a reflexiona riba nan propio experiencia den pasado na scol y e retonan cu nan a encontra cu e limitacion y forma di impone un idioma stranhero. “A viola tur clase di derecho y tur esaki debi di ta un pais colonisa. Nos a scoge pa un sistema di enseñansa a base di menasa y asina a doctrina nos cu idioma Hulandes ta mihor y Papiamento ta inferior, limitando tur desaroyo personal, emocional y cognitivo di nos hendenan,” Ras a enfatisa.
Kibrahacha
E promotor directo dr. Ronnie Severing, a expresa palabra di elogio na dr. Joyce Pereira, como un profesional cu un personalidad perseverante y a elabora riba e ilustracion riba portada di e tesis, e mata ‘kibrahacha’, cu segun dr. Severing ta representa forsa di idioma Papiamento como tambe di dr. Joyce Pereira mes.
“Pa mi sigur dr. Joyce Pereira tabata un inspiracion y motivacion enorme den mi pasion y dedicacion pa educacion y nos idioma Papiamento y awe mi ta sinti mi orguyoso cu e ta e prome persona na Aruba, Corsou y Boneiro, cu tin e titulo di doctorado den Papiamento,” asina Sue-Ann Ras a finalisa bisando.
