Dos baby a nace riba prome dia di aña 2020. E aña aki e mainta no a nace ningun baby ainda, sinembargo mas despues den dia dos baby a nace. Dos mama a duna luz riba prome di januari. Ambos ta mucha muhe.
E prome baby di aña 2020 a nace merdia 1:24pm na Dr. Horacio E. Oduber Hospital y a haya e nomber Evangeline Kate Caceres. Baby Evangeline ta e di dos yiu di Jullye Caceres y su tata ta Miguelito Geerman. Evangeline tin un peso di 3240 gram y un largura di 45 cm. Baby Evangeline a nace cu un operacion di emergencia. E mama no a spera e baby nace asina lihe door cu e tabata di nace dia 18 di januari 2020. E parto tabata poco complica pues e baby ta den couveuse pero e ta stabil. E famia ta masha orguyoso di por habri e prome dia di aña 2020 cu un miembro nobo den famia.
E di dos baby tambe ta un mucha muhe y a nace atardi pa 2:27pm.Su nomber ta Miqueas Castillo Ortiz. E ultimo dia di aña 2019 a nace un total di 2 baby di cual tur dos tabata mucha homber.
