Tabata alrededor di 10:20 di anochi cu a sosode un caso di hincamento den e barrio di Sabana Basora. Segun informacion, ta trata di un problema di bisiña cu a bay for di man. E casnan aki ta situa patras di Calidad Supermarket.
E problema a bay asina leu cu hasta dos persona a resulta seriamente herida cu hinca na lomba. Polis di San Nicolas tabata tin mester di refuerso pa por pone ordo na sitio, pues polis di otro distrito y teamnan special a presenta pa duna refuerso na nan coleganan.
Dado momento e personanan sospecha di e hincamento a core drenta cas. Sub fiscal a presenta na sitio y a duna autorizacion pa drenta y detene e sospechosonan. Na final a detene shete (7) persona, entre nan tanto homber como muher. Paramediconan a transporta e dos victimanan pa Hospitaal pa atencion medico avansa.
