Assault Racing tabata na Orlando, Merca, pa competi den campeonato di Latin American Import World Challenge. E dos coredonan di drag cu a bay ta Vernima Angela y Courtney Wouters, kende a resulta campeon den categoria di brommer.
Courtney Wouters, coredo di drag, a indica cu e experencia na Orlando Speed World tabata algo nobo y cu nan a pasa den momento duro. Nan a lucha basta prome cu nan por a logra bira campeon.
Wouters a participa den categoria di brommer, cu tabatin nuebe competido. Hopi di e brommernan ta di Merca, pero hopi di e motociclistanan ta Portoriqueño. Incluso el a confirma di ta bay sigui competi den exterior. Un di e cosnan cu nan tin den mente ta pa core ‘point standing’ na Orlando Speed World.
Vernima Angela, coredo di drag, a competi cu su pickup y a haci un tempo personal. Na Orlando e tambe ta participa den diferente competencia. El a splica cu cos ta bayendo bon y nan a cuminsa desde cero. El a manda su auto Merca pa haci algun trabou, y na momento cu esaki a keda cla, den luna di october Angela a core su prome evento. E resultado tabata uno bon y nan ta sigui avansa cada bes cu nan a bay.
E fin di siman tras di lomba el a core un tempo personal. El a splica cu nan a baha boost pa por a core e index di 7.50. Pero e mes a core un index di 7.16 di 200 miya cual ta algo nobo p’e. E sentimento pa esaki tabata uno cu e no por a splica. Pero, na Merca nan ta un tiki streng cu e reglanan.
Segun Angela, despues cu el a termina di core 200 miya, nan a par’e bek y mester cambi’e pa dos parachute. Na momento cu nan mester bay bek, nan tin un tiki gasto ya cu mester pone dos parachute. Nan ta den deliberacion cu e team, pero ta kere cu nan lo bay bek entre april cu mei.
El a bay cu e mentalidad pa gana den su categoria, pero ta lamenta di a kibra e di cuater y cinco gear. E mester cambia eseynan y sigui padilanti. Nan ta eynan pa core un tempo di seis. Den su siguiente biaha, segun Angela, e lo haci su maximo esfuerso pa core e tempo ey. Angela a gradici tur hende cu a sosten’e y sin lubida su sponsornan.
