E comerciante Gassan Azan di Alfabet Holdings na Jamaica, cu algun aña atras a cumpra e cadena di supermercadonan Van den Tweel, cu ta doño di Ling & Sons Food Market na Aruba, a caba di cumpra Hucor Holding na Corsou pa algun miyon Dollar Mericano. Cu esey, e magnate Jamaiquino ta tuma control over di e cadena di restaurantnan fast food Subway, Kentucky Fried Chicken y Pizza Hut na Corsou.
Separa di e restaurantnan di fast food, den e compra ta inclui Diamond’s Party, Diamond’s Home y tambe Antillean Pet Containers. Tur ta companianan cu e inversionista yui di Corsou, esta Hubert van Grieken q.e.p.d., a funda den pasado.
Gassan Azan ta propietario di e cadena di supermercado Van den Tweel na Corsou, Boneiro y di Ling & Sons Food Market na Aruba. Azan a cumpra e cadena di supermercado na aña 2018. Van den Tweel Groep a lansa Albert Heijn Supermarket na Corsou na aña 2007. Na aña 2011 a habri Van den Tweel Supermarket na Boneiro. Pues, Van den Tweel mes a inverti hopi den Caribe Hulandes, crece nan mercado y despues a bende e compania cu Alfabet Holding.
Na Jamaica, Azan y su grupo ta doño di MegaMart y Bashco, ambos ta companianan hopi grandi. El a funda Bashco Trading Company na aña 1990 y despues di 9 aña el a crea MegaMart, e prome ‘wholesale membership club’ na Portmore, St. Catherine. Awendia tin 12 Bashco y a expande MegaMart pa Portmore, Montego Bay y Mandeville. Ademas Gassan Azan ta CEO di Sizzling Slots tambe.
E inversionnan den Caribe Hulandes ta forma parti di su plan strategico di expansion y diversificacion despues di cuater aña cu e grupo di inversionista a cuminsa e proyecto Jamagro Tech Farms na Lakes Pen, St. Catherine na aña 2019. Esey ta un proyecto ‘state-of-the-art’ di agricultura y industrial na mes momento. E proyecto aki den e prome fase ta encera 25 hectar cu ‘greenhouse’ y 50 hectar di orkidia. Ta papia di un inversion di US$ 219.69 biyon Dollar Mericano na aña 2018 den economia di Jamaica.
