Dr Van Trigt den nomber di e organisacion di dokternan di cas a pidi comunidad pa no bay den panico relaciona cu e situacion di Covid19 cu tin aworaki riba nos isla. Actualmente hopi persona cu no tin mester di test kier exigi pa haci test. Esaki ta creando un avalancha di yamada via e number central. Aruba tin suficiente capacidad di test, sinembargo nos residentenan mester ta na altura na ki momento nan mester haci test.
Na momento cu e casonan local a cuminsa aumenta DVG a dicidi di re-activa e number di telefon pa localnan cu tin sintoma por jama. E number aki tabata solamente pa pa turista e ultimo lunanan. E central aki ta manda e yamadanan pa e dokternan di cas. E dokternan di cas ta evalua e situacion y si ta necesario ta haci un cita pa e persona test na DVG su test center. Di dia pa anochi e central a cuminsa ricibi un avalancha di yamada cual por trece e capacidad di contesta yamada den peliger. Ta pidi tur persona pa tin pasenshi debi cu Aruba tin e capacidad pa test pero mester tene cuenta pa nos no surpasa e capacidad mucho liher.
Hopi di e yamadanan ta di hendenan cu ta preocupa. Dokternan di cas kier pa e comunidad ta trankilo. Si acaso bo sinti sintoma, isola bo mes paden.
Durante e simanan promer cu frontera a habri e casonan di sintoma di griep tabata hopi minimo. Dokternan a manda esnan cu hopi sintoma test y mayoria a sali negativo. Mayoria di e personanan cu a test negativo a recupera mescos cu un griep.
Na momento cu a habri frontera, un par di turista lo a drenta positivo. Esakinan lo a bay un lugar publico y pega un local. Aki lo ta unda e prome kluster lo a cuminsa.
E protocol pa e personanan cu ta bin Dokter di cas ta keda vigente y ta urgi personanan cu tin sintoma pa haci uso di telefon pa jama y pa no bin e consultorio.
E situacion actual ta un bon recordatorio cu Covid19 ta presente y e ta importante pa proteha bo mes pa bo no pega otro persona. Facilmente 1 persona ta pega 2 pa 3 otro persona.
Nos tin cu deal cu e virus y haci tur intento pa no plam’e. Ta pidi pueblo di Aruba pa keda trankil. E ta consehabel pa test ora bo tin sintoma debi cu e test ta mas confiabel ora bo tin sintoma.
Nos tin cu deal cu ne y zorg pa no sigi plame.
