Na salida di e caso sumario (kort geding) cu a tuma luga awe mainta, entama door di Jan de Ruijter, el a expresa cu e tin hopi rabia pero ta prefera di no duna un comentario den hopi detaye awe ainda pero mas bien ta warda y haci esaki via un conferencia di prensa den dianan nos dilanti. Locual cu de Ruijter a comenta riba e defensa cu Minister dr. Rudy Lampe a bin cu ne den Corte ta cu e ta hopi baho. Ta locual el a ripiti varios biaha tambe, “baho baho baho” of tambe “smeerig”. Un defensa bou di nivel.
De Ruijter ta fungi como coordinador di proyecto American Hotel and Lodging Education Institute (ALEI) pa duna curso riba turismo na Aruba. Contract cu porcierto a caba na luna di april (pero tabata contract cu tabata renoba cada pasa 6 luna) y cu a pasa dor di un renobacion pa cinco biaha caba anteriormente. Por a nota un Jan de Ruijter disgusta cu ta enfatisa di no tin nada bon di bisa di Minister Lampe. Un persona gañado grandi y ta asina agita djis papiando di dje cu ta pidi algun minuut pa e por calma su mes pa por continua cu su entrevista.
Jan de Ruijter ta reclamando pago di dos luna (maart y april) cu segun su persona, e tin derecho riba dje y cual e no a ricibi te ainda. Tabata un acuerdo entre Minister Lampe y su persona cu a bay via whatsapp, via email y cu Lampe tabata consciente cu e mester pag’e pero a sinti fastioso pa duna un ordo na e Director di EPI, Ryan Maduro, p’e efectua e pago aki.
jan de Ruijter a vocifera cu e ta bay para duro contra e ponencia aki. Tambe e ta confirma di tin un contract cu gobierno pero ta bisa cu Lampe gewoonweg no kier pag’e y ta bisa cu Lampe ta bay siña un les aki di mete cu ne y si ta bringa e kier a bringa anto e ta haya guera.
Den corte tabata tey unicamente e abogado di e Minister. Den entrevista a haya oportunidad tambe pa puntra De Ruijter riba insinuacion di fractiemedewerker di Lampe cu a pone riba rednan social cu Jan de Ruijter ta un traidor y cu lo tin casonan di corupcion den su contra. Riba esaki Jan de Ruijter a contesta cu ningun momento e insinuacion ey ta conta p’e mas bien ta Rudy Lampe ta e traidor. Locual cu e ta sigur di dje ta, cu Lampe a scoge e persona robes pa bringa cu ne. Na final a expresa cu si e topa cu Minister Lampe na e momento ey, cu tin hopi chens cu e lo haya un “klap” den su cara.
Durante siman nos dilanti lo por spera un reaccion oficial di Jan de Ruijter caminda e lo amplia riba e situacion cu a pone cu awe e ta te den Corte pa busca su derecho.
