Docentenan di Colegio Arubano ta pidi retiro di SMOA

Den un carta oficial emiti siman pasa na Minister Presidente, Minister di Enseñansa y na Obispo Luis Secco, e docentenan di Colegio Arubano, uni bou di “Algemene Lerarenvergadering Colegio Arubano” ALV, a presenta un keho oficial tocante funcionamento di e directiva di nan scol. Den un forma cla, nan a mustra di no tin confiansa y cu tin hopi malcontento pa funcionamento di Stichting Middelbaar Onderwijs Aruba (SMOA), bou presidencia di e comerciante Robert Croes.

Den palabra cla ALV ta kehando SMOA na Gobierno y na Obispado cu e Hunta di Directiva a haci cambionan drastico na e scol, pero den sentido negativo. Tambe ta keha e directiva di no ta duna atencion na e clima di enseñansa di e scol, cu de facto, lo mester ta nan meta primordial. No ta trata di casonan incidental, sino, segun ALV, cu ta den forma structura ta cometiendo eror tras di eror cu a causa cu no tin confiansa den nan mas y cu ta reinando un malcontento grandi bou di e docentenan di e scol cu ta ofrece educacion na nivel HAVO y VWO.

De facto, locual e docentenan ta demandando ta pa henter e directiva di SMOA entrega nan retiro boluntario y na mes momento pa elimina tur e otro fundacionnan cu nan a lanta den banda y cambia tur e statutonan di SMOA bek. Ta pidi Obispado pa tira un bista riba e cambionan drastico cu a haci den e statutonan di scol. Ta pidi pa ora scoge miembronan nobo pa e directiva, pa garantisa cu ta hende cu tin afinidad pa enseñansa.

Den un tono mas determinante, e docentenan ta exigi pa reinstitui Rector Van Loon cu recientemente a tuma su retiro. Nan ta convenci cu esey a sosode debi na metemento di SMOA den su maneho. Esaki ta di 8 Rector of cabesante cu ta tuma retiro den e ultimo 9 añanan. Ta ora pa realisa cu no ta e Rectornan ta e problema, sino SMOA mes!

Di otro banda, SMOA den un carta dedica na ALV y cu copia pa tur mandatario y Obispo a lamenta cu a manda un carta envolviendo otronan den un asunto di scol. SMOA ta sigur cu si a pidi un reunion cu nan, cu sin duda lo a sinta na mesa pa repasa e kehonan y inkietudnan di e maestronan di Colegio Arubano.

Den forma concreto, SMOA ta desmenti tur e alegacion di e docentenan di Colegio Arubano den nan direccion. Nan ta insisti cu ora nan a tuma over, cu nan a hereda un scol cu hopi reto, entre otro sin un Rector pa dirigi e Colegio Arubano. A pone hopi tempo y energia pa yega na un bon hende cu por hiba e scol na un siguiente nivel. A bisa tambe cu a topa cu otro retonan sin spera manera ta menasa di tiramento na scol y despues awor Covid-19.

SMOA ta corda e docentenan cu nan no tey pa dirigi e scol, sino cu esey ta tarea di e Rector. Ta sinti cu hopi biaha docentenan kier regla asuntonan organisatorio of di operacion diario, cu de facto no ta cay bou di e responsabilidad di e Hunta di Directiva di SMOA. A laga un espacio habri pa papia cu e docentenan pa por aclaria nan punto, sin cu mester molestia Ministernan y Obispo den esaki.

Tocante Colegio Arubano

Stichting Middelbaar Onderwijs Aruba (SMOA) y Stichtig Karel Syndrom (SKS) a funda Colegio Arubano na aña 1959. Tabata Obispado di Corsou cu a funda SMOA. E tempo ey e scol tabata un HBS Catolico cu duracion di 5 aña, cu algun klas den barak y facilidad temporal na Maria College. E mesun aña ey, Obispo Holterman a bin Aruba for di pa inicia e scol personalmente. A habri e facilidad actual na Vondellaan tres aña despues, sin e edificio di tres piso cu a construi den añanan ’70. Na aña 1963 Obispo Holterman a bishita e edificio pa bendicion’e. Den añanan ’70 Colegio Arubano a ricibi dos bishita di Reina Juliana y Prins Bernhard.

Cu un institucion na Oranjestad y na San Nicolaas, Colegio Arubano ta ofrece un cantidad di mas o menos diesseis materia, dependiendo di e jaarlaag na nivel HAVo y VWO. E scol tin mas o menos 150 docente y mas o menos 2200 studiante. Na aña escolar 2004/2005 a introduci “Ciclo Basico” y na aña escolar 2006/2007 a introduci “Ciclo Avansa”. A base di e resultadonan di scol, e alumnonan di Ciclo Basico por continua pa e di tres aña di Ciclo Avansa HAVO of Ciclo Avansa VWO. 

Na 1972 e scol a haya su prome rector Arubiano, den persona di Richard Harms. Na aña 1979 Dolf Hoevertsz a tuma e puesto aki. E siguente rector tabata Hector Kolfin desde 1993 te cu 2010.