Dios ta stima nos tur, sin distingui ningun hende,Dios ta amor, Dios no ta cambia, E ta mesun Dios di ayera, awe y pa semper.
Cristo Hesus ta e unico mediador entre Dios y hende, no tin otro, esun cu tin e Yiu tin e Tata, esun cu ta honra E yiu , ta honra e Tata, E Tata cu e yiu ta uno.
Hopi hende ta bisa ta un Dios so tin, pero nan ta lubida cu Dios ta expresa su amor pa medio di su yiu Cristo Hesus. No tin otro manera pa yega serca e Tata sino ta pa medio di e yiu.
Dios a entrega su yiu unigenito pa ken cu kere den dje no bay perdi ma ricibi bida eterna, esey ta nifica cu tur hende tin mesun derechi di kere den e yiu di Dios. E porta ta habri pa tur hende, Dios no ta rechasa ningun hende, pero hende cu nan pensamento y actitud ta rechasa Dios.
Hende ta kere cu nan por biba manera nan kier y Dios tin cu acepta nan rebeldia, y inmoralidad en bes di nan somete nan mes na Dios.(Romanonan 1:18-32) ( Romanonan 2:1-8).
E palabra di Dios ta bisa : Esun cu kere lo ta salba, y esun cu no kere lo ta condena caba, pasobra e no a kere den e yiu unigenito di Dios,(Juan 3:16-18)
Kiermen nos salbacion y nos bida eterna ta depende den ken nos ta kere, pasobra salbacion ta bini di Cristo Hesus solamente. Ora Dios ta bisa si bo kere, esey ta nifica cu Dios tin tur control di nos bida, E sa ken ta kere di berdad y ken ta haci wega.
Romanonan Capitulo 8 :1 Ta bisa bon cla cu no tin condenacion pa esnan cu ta den Cristo
Ki ora bo ta salba ? Romanonan 10:9 ta bisa: Cu si bo confesa cu bo boca cu Hesus ta Señor y kere den bo curason cu Dios a lant’e for di mortonan lo bo ta salba. Esaki no ta religion pero ta un confesion cu tur ser humano, cu ta desea di tin bida eterna mester haci.
Nos mester entrega di curason pasobra nos no por biba un bida mitar pa Cristo y mitar pa mundo , pasobra Cristo ta bin busca su pueblo pero e dia y e ora ningun hende no sa, y si nos ta mitar den Cristo nos ta keda atras.
Pasobra cu curason hende ta kere pa haya husticia y cu boca e ta confesa pa haya salbacion. (Romanonan 10:10)
P’esey nos mester cuida nos salbacion cu temor y temblor, esey ta nifica, cu tin cu keda den presencia di Dios tur momento, cumpliendo cu Su Palabra y Su Boluntad.
Den e tempo trabahoso cu nos ta bibando caminda hende a lubida riba Dios y ta busca tur manera pa haci locual cu nan kier y pone Dios na ultimo luga. Hende a bira stimado di nan mes mas cu Dios.
Y hopi hende ta hasta desea y envidia malbadonan ora nan mira nan ta crece, y ta lubida cu ningun malbado cu no arepenti lo no drenta e reino di Dios.(Galationan 5:19-21).
P’esey awor mas cu nunca nos mester: Kere den Hesus Cristo y biba pa Cristo, aparta di locual ta malo y haci bon.
Declara cada dia cu nos boca cu ami y mi cas ta sirbi Señor.
Esun cu tin E yiu, tin e Tata.
Sinceramente, Pastor Marcel Balootje.
