Pronto comunidad di Aruba lo haya un fecha pa bin busca nan plachi di number di vehiculo di motor. Vocero di Departamento di Impuesto, Meverly Romano, tabata tey presente hunto cu su coleganan y personal di Retraco, pa asina haci e trabaonan di bahamento di container y e preparacion cu ta bay cuminsa pa separacion di plachi.
E ta sigui splica cu awe mainta 9’or e container cu e cahanan di plachi di number a yega na DIMP. Tin mas of menos 88.700 number registra den tur e categorianan pa Aruba. Pero normalmente ta bestel extra di reserva pa e demanda cu tin cu sa cu tur aña pa extra number cada bes.
Pesey semper ta bestel un cantidad extra. Awe mainta e personal a baha 1066 caha for di e container. Ta un trabao hopi grandi, segun Romano. DIMP ta hopi gradicido cu e trabao cu a bin ta haciendo for di mainta tempran. Tur esaki ta pa prepara pa por otorga e plachinan mas lihe posibel, na tur e contribuyentenan cu ya caba a haci nan pago.
DIMP tin basta contribuyente cu desde 16 di december cu a cuminsa acepta e pagonan, a cumpli. Na e momentonan aki tin mas of menos 70% of un tiki mas cu a sa di paga. E ta un cantidad basta grandi cu ta preparando p’e y dentro di poco ta bay anuncia e fecha. Na e momentonan aki no por anuncia e fecha ainda, pasobra e trabao interno ta hopi grandi.
Tin cu bay controla tur e numbernan, tur e plachinan, un pa un, si tur e numbernan tey. Ta un trabao cu ta tuma algun dia di trabao. Pronto por bisa publico en general cu lo anuncia e fecha. Keda pendiente di DIMP. Ta preparando tambe pa un conferencia di prensa cu mas sigur lo tuma luga den e siman cu ta bin. Asina por duna mas informacion na peublo di Aruba.
