Ludwina Maria, conoci como “Dina” ta autor di e buki “Conoce bo Isla”. E ta conta cu el a sinti su mes hopi contento cu e lansamento. E sala na Biblioteca Nacional tabata practicamente yen. E mes no a spera cu asina tanto hende a presencia lansamento di su buki.
Dina ta conta cu e mes ta biba na Hulanda y a cuminsa traha riba e buki basta tempo pasa. Tur e trabao pa por a yega te asina leu na Aruba, e mester gradici su sobrina Rachelle. El a tuma e responsabilidad riba dje pa haci tur e trabaonan cu mester a wordo haci pa asina por a yega asina leu cu e buki.
Tambe e organisacion di e anochi aki, hunto cu su amiga Marijke, nan a percura pa tur cos. Dina ta hopi contento y orguyoso.
Pa loke ta preparacion di e buki, a tuma e ultimo dos añanan. Tempo cu Dina a cuminsa, e no a pensa pa bira un buki, sino algo pa mucha, manera cu e sa haci paginanan di mucha den corant. E tin hopi peuzel traha y a mustra su sobrina. El a opina cu por traha un buki di dje.
Su sobrina a cana busca informacion y na final a dicidi pa bay pa e buki.
Pa loke ta e reaccion di e publico, tabata hopi bon. For di prome cu e buki a sali, e publico tabata hopi entusiasma. Dina ta conta cu un dia el a bay censo pa busca informacion unda cu e por haya lista nobo di e cayanan di Aruba mirando cu nan a cambia. Ora cu a mustra un trahado di censo e dummy cu e tabata tin, esaki a reacciona cu manera cu saca e buki, e tambe lo cumpra uno.
Den un solo palabra, Dina a keda sumamente contento cu e respons cu el a haya di e publico pa loke ta lansamento di su buki.
