John Fun tabata manager di facilidad na Hospital. Awo e no tin un funcion ainda, pero e ta yudando cu e renobacion di Hospital. Su responsabilidad principal den e grupo aki, ta pa percura pa e mudansanan interno cu tin cu haci pa acomoda e contratistanan.

E ta bayendo bon, segun Fun. Nan a muda completamente pa edificio nobo. Eynan tin piso 0, cual ta SEH, bayendo te cu piso 4. Diferente cambio di plan mester a tuma luga caminda a dicidi cu e futuro ICU lo ta di cinco piso y e construccion den e di cinco piso cu tambe ta andando. A muda diferente departamento den e edificio existente, di pabou bay pariba. Dos departamento ainda mester wordo muda. Esey lo sosode pa comienso di aña pa bay p’ariba y e parti p’abao ta keda completamente liber pa por acomoda e contratista pa e cuminsa cu  trabaonan di renobacion eynan. E contratistanan cu a bay cu e vakantie anual. Tin algun contratista a keda, pero ta haciendo trabaonan chikito den e edificio. Tin un parti di pashent cu ainda mester move. Un di e movemento ta trata di pashent, afdeling di cirugia y e otro ta trata un otro departamento caminda cu nan ta bay cas despues di operacion, cual ta dag opname.

 

Proyecto ta bayendo bon

No tin ningun proyecto cu no tin problema y hospital no ta e excepcion tampoco, segun Fun. Pero ta purba di focus riba e edificio, e facilidadnan nobo cu ta bay haya. Algo cu tabata necesario, despues di ta den un edificio bieu di 40 aña. Ora cana rond den e edificio e ta bisa su mes cu tabata tempo pa haya un edificio mas nobo y e facilidadnan moderno cual por brinda miho servicio na e pashentnan. Semper e organisacion ta pone e pashent central y tur esaki ta cu e meta pa duna e miho servicio pa comunidad di Aruba.

 

Kico a haci e mudamento exitoso

E organisacion ta un tiki complica pasobra tin tres partido envolvi. Normalmente e doño di trabao ta huur un contratista y nan dos ta traha hunto. Aki ta tres partido tin envolvi. Uno ta gobierno cu ta e doño di edificio y tambe ta e opdrachtgever. Nan ta wordo representa pa SOGA. E di dos ta e contratista y e di tres ta hospital. Tur asunto tin cu papia cu SOGA cu ta e opdrachtgever y nan ta deal verder cu e contratista. Esey naturalmente ta rekeri redtape y hopi biaha ta causa tardansa. Pero asina sea, segun Fun. Nan ta traha cu e situacion y e ta bayendo bon.

 

Kedamento cla

Fun a splica cu pa e edificio nobo, a wordo entrega un tiki laat, pero e contratista ta sinti comodo cu nan por haal in e retraso y si tur cos bay bon, na 2019, mas of menos na final, e proyecto completo lo ta cla.