Tin cosnan masha facil pa bisa cu no ta kere den un psicologo of psikiatra, segun psicologo Diana Uribe. E ta sigui splica cu nan no ta haci bruheria of lesa carta pa nan pashent.
Si tin un dolor di djente, un buraco den djente, tin cu bay un dentista. Si tin un problema di curason, tin cu bay un cardiologo. Si tin un problema cu pensamento cu bo emocion, como e forma con bo ta handle e cosnan, cu bo comportacion, unda bo tin cu bay? Cerca un profesional di salud mental, cu a studia pa esaki.
Si bo ta bisa cu bo no ta kere den dje, ta mesun cos cu bo ta bisando cu bo no ta kere den un dentista, of bo no ta kere den un cardiologo. Ta necesario pa por eradica e tipo di pensamento aki cu ta bieu, no siña nos hoben y muchanan cu esey e ta, of pone e stigma cu bay cerca un psicologo of un psikiatra, a pasobra bo ta loco. Esey no ta berdad segun dr. Uribe. No ta pa hende loco so. Hende normal tambe ta bay un psikiatra of un psiclogo.
Dr. Diana Uribe a splica cu pa por haya cifra, ta un di e partinan cu no tin, cual ta un bon registro riba esnan cu ta sufri di depresion. Ta algo cu ta trahando riba esey si. No tin un registro cu por hiba un estadistica completo. Lo mester bin cu un union di tur e informacion, di tur e profesionalnan pa por papia di cifranan exacto. Sin embargo e tendencia mundial, cual Organisacion Mundial di salud ta wak, cu e ta e causa number 1 di AO mundial y ta e enfermedad mental mas comun.
Por cura di dje?
Pa tratamento di depresion ta psicoterapia y tratamento di farmacologia, esta tratamento di pildo. Ta necesario cu bo ta haci tratamento y si bo no ta haci uno adecua, bo tin e tendencia cu e sintoma por reaparece. Bo por control’e, pero e lo tin e riesgo cu e por aparece di nobo den bo bida.
Dicon ta busca morto ora di depresion
Dr. Diana Uribe a splica cu tin un tipo di depresion cu hende ta pensa riba morto. Ta diferente depresion tin, y un depresion grandi ta ora cu e persona no ta wak ningun solucion pa su problema y su vision di tunnel ta haci cu e lo ta e pensa cu e unico forma pa e por deal cu esaki ta si e muri. E tin parti di e depresion cual ta sentimentonan di culpa y autoestima abao, caminda cu e persona ta bisa cu e no ta sirbi, cu ta miho si e no ta bibo y eynan ta bin e pensamentonan di suicidio. E depresion ta mas grnadi den e poblacion di hende muhe si, compara cu den hende homber. Pero esun cu ta comete mas suicidio ta hende homber. E ta net bira. Muhenan ta mas deprimi cu hende homber, pero ta e hende homber ta esun cu mas ta comete suicidio, dr. Diana Uribe a bisa por ultimo.
