Dia 17 di Mei ta bay tin un manifestacion organisa pa Yuri Bracho, riba abuso di mucha y ta invita henter e pueblo di Aruba pa, hunto cun’e, pa por bay Linear Park. E lo ta pa 4’or di atardi, te cu 7’or di anochi.
E lo sali di Linear Park te cu Bestuurskantoor. E manifestacion aki no ta algo di color politico, sin pa tur mucha. Mester papia riba secrecia medico. Mester por bin cambio pa duna mas castigo na e pedofielnan aki. Mester bin cambio den instancianan. Mester por bin mas ayudo riba nos muchanan. No solamente cu nan ta bay cera, haya seis luna y despues ta sali bek.
Mester por marca e hendenan aki, mester por sigui nan tras y habri un website y mustra kendenan ta pedofiel y haci daño.
Ta anuncia manifestacion contra abuso di menor 17 di mei
Posted by 24ora on Tuesday, May 14, 2019
Durante di e conferencia di prensa cu a tuma luga na FTA, Bracho a remarca cu ora bo abusa di un mucha, e ta keda marca pa semper. E no ta e momento eynan so. Bo ta marca un criatura cu pa henter su bida e no lo bay lubida, loke el a pasa den dje. E hende cu a haci’e, cu a desgracia e mucha pa henter su bida, ta dune un castigo chikito, bay sinta dos aña of hera ta un aña y mey of seis luna, anto sali bek. No ta wordo persigui, no ta wordo marca. Mester mark’e na aeropuerto, pone un website y indica loke cu tin na Aruba. Hende por check, kende nan ta. Manera cu nan wordo deteni, pone nan cara.
Tin ta bisa cu esey ta contra ley. Mester por haci algo y cu ta basta. Esaki no ta solamente dia 17 di Mei. Bracho ta sigui cu e ta cla pa sigui y no aki dos of tres aña e ta bin bek. E ta cla pa aki 30 dia, e por ta aki dos luna. Pero e lo sali bek si e no ta sinti cu loke el a trece dilanti diabierna awo, si e cambio no tey ainda. Si bo por haci yen di cambio pa ley, bo por bin cu un reunion extraordinario. Por haci tanto cos, anto esaki mester ta importante pa nos muchanan.
No mester pa esaki pasa na un yiu di un politico of algo. Ta basta, pasobra ta demasiado pa dia. E momento pa tey ta awo. Bracho lo bay keda riba dje te ora e sinti cu a logra. Ta pa tur nos yiunan. E por pasa cu cualkier di e muchanan. Bo no ta warda e momento eynan. Instancianan mester por educa nan mes mas miho.
Un ehempel cu por duna ta cu e mucha tin cu sigui’e for di inicio te na su fin. E cos a sosode awo, keda tras di e mucha, keda tras di e mama, sostene e famia. Duna nan mas forsa. Refortalece mas e muchanan. Keda nan tras como un guia. Esey ta un di e puntonan cu Bracho a trece p’adilanti.
Ora bo keda yama Voogdijraad, bo tin cu keda pendiente te ora cu haya nan. Y ora cu haya nan, e persona cu ta specialisa riba e caso, no tey. Of nan tin demasiado caso riba su lomba. Tin tiki hende. E casonan ta keda aumenta y e trahadonan ta keda ey, cu man cruza. Casi nunca nan no tin tempo, ni p’abo ni pabo yiunan. No ta pasobra ta abo, tin caso. Nan tin por ta tres of cuater caso pa dia, hera ta mas. E calidad pa atende e caso ta keda baha y e casonan ta keda subi. Esey ta haci cu hopi mama ta pensa cu e no ta hayando sosten. Hopi biaha nan ta tuma represalia contra bo.
Bracho a splica cu otronan ta bin cerca dje cu tin hende ta manda nan informacionnan riba tipo di casonan asina. No ta algo cu ta pasa cun’e so. Sino cu hopi mas hende ta pasa aden y esey ta e gran problema cu tin awo.
Ta bisa cu si ta bay cambia ley, cu ta bay trat’e, pero ki dia, na ki momento ta haya considerabel cu awor aki si, diripente ta sali y ta bay haci e cambio. E cambio tey pa ki dia, Bracho ta puntra.
Pakico warda tanto tempo, cuanto mucha mas tin cu wordo perhudica pa e cambio por bin. Kico mas kier pa mas mucha wordo abusa pa bisa cu ‘awe ta e dia’. E dia tey caba, e ora tey caba. Ta basta di sigui warda. No mas mucha mester wordo anuncia. Mester duna secrecia medico. Laga e trahadonan social of e docente, por entrega keho. Laga nan, si e mama no kier haci’e, pa motibo di famia, duna nan sosten y cu por haci’e. E cambio tey. Esey ta bay bira manera un epidemia cu mester caba. E maldicion mester caba. E iglesianan mester uni. Esaki no ta bira pa religion. E ta bira cu Aruba mester di bendicion y oracion. No keda bay diadomingo misa y no predica e palabra den bo mes. E por cambia den gobernacion.
Asina ta, Aruba henter ta invita pa bin diabierna, dia 17 di Mei, na Linear park pa 4’or di atardi. Famianan, mama, tata y nan yiunan ta invita pa bin marcha. Mucha muhenan por bin cu un popchi y mucha hombernan cu un coy hunga, pa asina demostra cu esey ta loke nan ta, muchanan cu merece tur proteccion y loke nan tin cu haci durante nan infancia, ta hunga. Despues lo cana bay bestuurskantoor, caminda cu nan por reuni te cu 7’or di anochi.
