Ora scucha expression di algun pensionado cu kier expresa cosnan no berdad, ta motibo pa Sali bisa e berdad. Nan kier haya dominio di placa di otro pensionadonan cu tambe a cana e caminda di corte. E acusacion contra minister no a cay den bon tera. Minister Arends ta haya lamentabel cu sr. Van Doornspreek ta indica y ta bisa, of e werkgroep ta bisa cu Gobierno ta gaña, cu Gobierno no ta cumpli. Esey absolutamente no ta e caso. For di dia 3 di Juli ta wardando e informacion cu tin mester pa efectua e pago. Ora cu tin un caso asina, Gobierno, land Aruba, of cualkier partido, mester di un finale kwijting. Y mester sa precies si tin acuerdo firma di e suma, como tambe e nomber di e persona. No tin discusion riba loke ta trata wettelijke rente. Gobierno a tuma un decision di principio cu hasta esnan cu hues no a dicta specificamente na nan fabor, ta haya nan wettelijke rente paga for di Juni di 2006.
Tur wettelijke rente ta core mescos. No tin discusion ni entre werkgroep ni tampoco cu directie financier over di wettelijke rente. E suma pa e representantenan y Gobierno ta klop, solamente cu for di dia 3 di Juli ta wardando e lista completo y solamente siman pasa a haya un lista preliminar. Tampoco e no ta completo. Ta wardando accion di parti di directie financien y directie wetgeving, si ta bay over na ehecuta un di dos pago, un pago parcial na un parti di e di dos grupo y ta warda ora haya e demas nombernan.
Gobierno ta cumpli. Ta algo cu prome minister y minister Mike de Meza, hunto cu SEPPA a yega na un acuerdo di principio, prome cu minister Arends a bira minister di asuntonan economico. Na momento cu el a bira minister, a traha diligentemente riba e leynan cu a bay parlamento y e autorisacion eynan el a haya dia 28 di Juni y dia 3 di Juli a sinta. Dia 4 di Augustus, e prome grupo a wordo paga y te cu fecha di awe, no tin un lista final di e representantenan di werkgroep pa loke ta trata e di dos grupo cu mester wordo paga. Gobierno tambe tin interes pa soluciona e caso aki, pa finalisa e caso aki, pero ta depende tambe di informacion. Si conoce un persona cu ta den e di dos grupo y ainda e no a firma nada, no a firma ningun confirmacion ni di su suma ni tampoco di nomber y tur e datonan, por fabor, acudi na Directie Financien, pasobra asina por agilisa e proceso hopi mas. A nota cu tin representantenan, como cu tin interesnan ora tin placa y esey ta lamentabel. Ora cu tin interesnan, esey ta stroba tin biaha e proceso. Si no a firma ainda, por fabor acudi na directie financien, pa e ora Land Aruba por caba di efectua e di dos pago.
E 1.5 miyon, e prome grupo cu nan ta yama Bernadina y 32 otro ex empleado, nan placa ta cerca abogado Ecury. E di dos grupo, cu ta di 60 hende, kende ta wordo representa pa sr. Van Doornspreek. Obviamente ta depende di dje pa haya informacion. Si haya cu ta tarda, acudi na directie financien pa haya nomber y datonan precies.
