Polisnan tabata tin man yen cu hendenan cu no tabata comporta nan mes durante e parada di Fakkel. Na aña 2017 tabatin 8 detencion, pero den 2018 e cantidad a triplifica y a alcansa 24 detencion. E edadnan tabata varia, for di menor di edad te adulto.
Di e 24 detencionnan tabatin:
- 2 pa stuur bou influencia di alcohol, a kita rijbewijs di ambos chauffeur, specialmente pasobra un di e sospechosonan a supla 1035 ug/l cu ta mas di 4 biaha e limite acepta pa ley.
- 1 cu Husticia tabata buscando algun dia caba
- E resto mayoria tabata pa “Openbare Dronkenschap” of bringamento.
Na warda di Polis di Playa tabatin tres subfiscal sperando riba tur e detenidonan for di riba caya. Asina cu nan pasa e proceso di interogacion, ta evalua y dicidi si nan ta keda sera.
Basta di nan a haya un cel gratis. Cu busnan di CEA tabata transporta tur esunnan deteni durante parada pa Warda di Polis di Playa. Despues esunnan cu a keda encarcela tabata sali cu bus di CEA atrobe pa Warda di Polis di Shaba, unda tin cel pa cera detenidonan.
Polis a confirma cu e consumo di alcohol tabata hopi halto entre e muchanan. Esaki sigur no ta algo corecto. Tambe a nota hopi mayor cu den forma iresponsabel tabata cu mucha, tin biaha hasta baby den wieg, te den oranan lat di marduga riba caya cu zonido duro!
Na tur a traha 150 Polis durante e parada di Flambeu aki.
Ta sinti cu e parada a cuminsa cu mal pia. E speranza ta pa e situacion aki no bolbe ripiti y pa e siguiente paradanan cu falta hendenan comporta nan mes. Esaki ta algun di e imagennan di e detencionnan di e parada di Fakkel Optocht. Riba caya tambe a para chauffeurnan bebi coriendo auto.
