Ora bo no tin conocemento di e palabra di Dios, bo ta cana den ignorancia, pasobra bo no sa locual Dios ta bisa cu bo tin di haci.
Pero ora bo conoce e palabra di Dios y toch bo ta haci lo contrario, na e momento ey bo ta den desobediencia, pasobra bo ta consciente di locual bo ta haci.
Y nos tur sa como mayor cu e fruta di desobediencia, ta berguensa, dolor, yoramento, pleito y division.
Desobediencia ta un pakete completo cu ta inclui tur tipo di maldad, pasobra desobediencia ta hiba bo na otro desobediencia. P’esey tur mayor mester reconoce desobediencia di nan mes y di nan yiunan. Rebeldia contra Dios.
Si nos wak e asunto di desobediencia bon, e ta nifica bobedad contra Dios, pasobra ora bo ta desobediente contra bo mayornan, husticia, scol, etc., bo no ta den desobediencia contra hende solamente, pero contra Dios. Pasobra ta Dios a establece tur eseynan. Y Dios ta Todopoderoso.
Y yiu prodigo tabata den desobediencia y el a yega te na cuminda di porco. Y hasta esey a nenga na dje. Y n’e momento ey el a bin realisa con leu desobediencia por hiba hende y el a bira su cara bek pa cas di su tata.
Ora mayor ta biba den desobediencia na Dios, henter e cas ta core peliger.
Despues cu pueblo di Israel a scoge Saul como rey, el a cana den desobediencia na Dios y hinca henter e pais den problema. (P’esey e no por a bringa contra Goliath)
David a cana den desobediencia na Dios y hinca henter su famia den problema. Pero despues a arepenti y pidi pordon. (Salmo 51)
A cana den desobediencia na Dios y hinca su cas y e pueblo di Israel den problema.
Ora rey Saul a nota cu Dios a aparta fo’i dje pa motibo di su desobediencia, el a scoge caminda di bruheria.
Un hende por tin hopi consehero, pero masha poco biaha bo ta tende cu un consehero ta papia di desobediencia na Dios. (Lesa Romanonan 2:5-11)
Hende obediente y cu temor di Dios, no ta tur hende kier tin amistad cu bo.
Un amigo cu no por bisa e otro amigo su berdad den su cara tocante desobediencia na Dios, no ta un bon amigo sino un compinchi y pa motibo di placa hopi ta bira compinchi.
Juan Buatista e demostra Herodes cu e no por ta su compinchi den su maldad, mescos awendia nos no por smile y sigui smile, mientras cu nos ta mira desobediencia na Dios, tuma luga tur dia.
Dios ta trata desobediencia cu man duro. Wak kico a pasa cu Jonas, cu siendo profeta di Dios, el a kere cu e por haci manera e kier. (Jonas 1) y tambe Moises y Aaron (Numbernan 20:12).
Salmo 107:17 ta bisa: “Bobonan ta wordo afligi pa motibo di nan comportacion rebelde y pa motibo di nan inikidadnan.”
No laga no tin hende desobediente na Dios den nos cas, pero laga nos tur humilia nos mes dilanti di Dios y arepenti di nos picanan. Pasobra nos tur sa cu desobediencia ta hiba na rebeldia y rebeldia ta hiba na bruheria y despues cu tur e consecuencia negativo cu por tin.
Dios ta pordona: 1 Juan 1:9.
Pastoor Marcel Balootje