Derrel Lampe ta bek despues di representa Aruba den e certamen di Supranational. El a menciona di ta hopi agradecido cu tur famia y amigo cu a bay ricibie na aeropuerto. Derrel ta conta cu, e evento a bay hopi bon. E ta satisfecho di por a clasifica den e top 20, mirando cu a competi contra varios pais di peso grandi manera por ehempel Brasil y Filipina. Derrel ta conta cu e nunca a stop di smile.
Pa Derrel, no tin palabra pa describi e sentimento di representa nos isla. E ta comenta cu el a sinti cu e lo a bay ‘flauw’. E emocionnan tabata hopi halto. Derrel su compañe di camber tabata e representante di Mexico. Den pasado, Miss Universe Aruba a ‘click’ hopi bon cu Miss Mexico.
Den e dianan ey, e participantenan a intercambia cultura cu otro. Derrel ta conta cu te hasta el a probecha di comparti nos idioma Papiamento cu e demas participantenan. Hopi di e participantenan no tabata sa unda Aruba ta.
E sonrisa di Derrel a capta atencion di e huradonan, pa cu esaki el bin cas cu e premio di ‘Mr. Personality.’ E ta gradici na tur persona cu a yud’e di un manera of otro. E lo tuma algun dia pa por comparti cu su famia y amigo. E tin dos oferta caba, pero e lo analisa esaki.
Hendrik Croes, a bay hunto cu Derrel. Nan a biaha pa un periodo di dos siman pa Polonia. E rol di Hendrik tabata pa apoy’e durante tur e dianan. E ta menciona cu e no por splica e sensacion ora cu den un sala grandisimo y bo ta scucha e nomber di Aruba. E comentario ricibi tabata cu nunca nan a mira un participante asina alegre riba stage. Croes ta urgi pa tur hende traha hunto. Esaki ta e prome biaha cu un Arubiano ta participa den e Mister Supranational.
