Durante un conferencia di prensa diahuebs mainta, gerencia di Departamento di Impuesto a anuncia otro innovacion den nan departamento. Awo nan tin nan propio app.
Departamento di Impuesto ta consisti di 263 trahado, y nan Meta y Mision ta pa garantisa cobransa di impuesto y facilita e contribuyentenan cu nan debernan fiscal, dunando un servicio eleva.
Segun directora di DIMP, Luenne Pieters, dunando un servicio eleva, tambe ta bin semper na pensa di e critica of feedback cu ta haya di e contribuyentenan, caminda cu ta mira cu mester ta un tiki mas innovativo y moderno pa crea tambe un ambiente, unda cu e drempel entre e comunicacion di e contribuyente cu e departamento ta bira uno un tiki mas abao y por comunica na un manera hopi mas moderno y innovativo.
Diabierna mainta a anuncia cu ta bay lansa un app cu a desaroya specificamente pa Departamento di Impuesto. E app yama BoImpuesto ta disponibel caba riba Apple Store. Pa fin di luna ta bay tin esaki tambe cla pa Android y e app aki ta diseña specificamente pa Departamento di Impuesto.
Dicon laga diseña un app
Cu e app aki Departamento di Impuesto ta un tiki mas cerca di un forma di comunica un tiki mas moderno cu clientenan. No por haya pago di impuesto uno mas agradabel, pero si por facilita clientenan dunando informacion cu ta na nan disposicion y tambe facilita e trayecto di pago di impuesto p’asina ey nan por cumpli cu nan debernan den un manera un tiki mas facil, un tiki mas lihe.A laga diseña e app aki cu e iniciativa cu a cuminsa na cas, cerca e team di IT y tambe Informatie Management. A laga un compania independiente diseña e app yama BoImpuesto. Su abreviacion ta BoI. Cu e abreviacion aki, segun Pieters, e ta capta atencion di contribuyentenan. E ta un tiki mas facil den mercadeo, pero tambe e ta capta atencion no solamente di contribuyentenan, pero tambe di coleganan cu ta traha na e Departamento di Impuesto.
Si mester papia di BoI, den futuro tur sa cu esaki ta e app di BoImpuesto di Departamento di Impuesto. A laga diseña y introduci tambe diahuebs mainta, un figura cu ta bay fungi como ayudante den e proceso di duna un tiki mas servicio na clientenan.
Ta trata aki di un superheroe. A uza un lenguahe pa un tagline cu ta un lenguahe un tiki mas comun. Pieters a sigui splica cu no por haci pago di impuesto mas agradabel, pero si haci e proceso mas eficiente y tambe facilita e cliente den e proceso. A uza “full suave” como un tagline pa e app. Loke kier bisa ta cu ta facilita e clientenan di tal manera cu nan por paga nan impuesto y haya informacion y tur cos ta cana suave manera cu nos hobennan ta bisa tambe.
Esey ta un tagline cu a bin cun’e conhuntamente cu departamentonan den e organisacion. A haya diferente input internamente pa loke ta e app. Den e app por haya informacion, por ricibi noticia, bo por crea bo propio perfil si bo kier haya informacion di BBO so, di premies so, etc. Si bo kier controla si bo plachi di number ta paga, bo por haci esaki via app. Pieters kier encurasha contribuyentenan pa download BoImpuesto (BoI) riba iPhone. Si tin un android, esaki ta bay ta disponibel pa fin di luna y ta bay tin funcionalidad na caminda. Naturalmente esaki ta e base cu ta bay sigui traha cun’e. Pa final di aña ta bay tin formularionan di impuesto tambe online. Ta trata aki di formularionan di loonbelasting/BBO cu tur luna tin cu wordo entrega. Esakinan ta wordo añadi, si tur cos ta bon, cu tecnicanan cu ta existi actualmente, no solamente riba nan website cual ta diseña pa contribuyentenan pero tambe lo ta disponibel den e app p’asina den palma di bo man, bo lo por cumpli cu bo impuesto y cosnan ta cana “full suave” p’abo.
