Seccion di Investigacion y Documentacion, di Departamento di Cultura Aruba (DCA) a haci un presentacion recientemente di un proyecto cu ta hiba e nomber “ Biografia di Artista di Musica Arubano”riba e Dia di Santa Cecilia, patrona di musiconan na Biblioteca Nacional Aruba.
Como dies artista for di e diesdosnan a ricibi un parti di nan biografia, hunto cu grabacion di nan entrevista y mas un pin di bandera di Aruba. DCA ta sigui mira e necesidad pa rescata informacion cu ta regarda musica y cu e proyecto aki di “Biografia di Artista di Musica Arubano” lo salvaguardia informacion importante di tanto e logro di e artista y su trayectoria musical. Creando asina e oportunidad na e comunidad Arubano pa haya sa mas di nos artistanan di musica, y di nos herencia cultural rescata. Despues hobennan cu lo desea di haci uzo di e informacion aki cu lo ta forma parti di nan estudio tambe ta posibel. Na final e lo bira un buki di ‘Biografia di Artista di Musica Arubano’. Lo trece tur esaki na conocemento di nos hobennan den un forma di presentacion na scolnan y informa nan e importancia di e trabou di e investigacion realisa.
Recientemente sr. Chencho Kelly y sr. Johnny Scharbaay, lidernan di e proyecto di Seccion di Investigacion y Documentacion na DCA a haci entrega di e parti di biografia hunto cu un grabacion di entrevista y un pin di e bandera di Aruba na sr. Seferino Martin Quandus, miho conoci como Martin. Esaki a tuma luga na su residencia y como reconocimento na nos artistanan di nos musica Arubano pa nan contribucion na Aruba su herencia cultural musical. Departamento di Cultura Aruba ta gradici tur e artistanan participante di e proyecto aki. Danki na nos lidernan Kelly y Scharbaay di e proyecto y na drs. Shailiny Tromp-Lee, kende tabata hefe di Seccion di Investigacion y Documentacion, awe ta Honorabel Miembro di Parlamento di Aruba. En particular un danki na tur e empleadonan di Seccion di Investigacion y Documentacion cu a duna nan aporte pa realisacion y exito di e prome fase di e proyecto aki.
