Pa mas o menos 10:00am a bati alarma pa un desgracia serio cu varios herido na altura di ex-Bushiri Hotel riba L.G. Smith Boulevard. Na e sitio a topa cu un pick-up marca Chevrolet cu number A-13866 cu a dal tras di un Tourbus, T-294, den cual tabatin 6 pasahero cu a subi na waf y tabata rumbo lama.
E impacto tabata asina fuerte cu 4 pasahero a resulta herida, pa cual ambulance a presenta na e sitio pa trata e heridonan y despues transportanan pa Hospital. Chauffeur di e Tourbus ta e conocido cantante di Calypso, esta Carl Nichols. El a bisa na e sitio di no sa di unda e pickup a bin asina duro y dal su tras, pasobra e mester a brake dor di trafico su dilanti. E practica di Tourbusnan pa lanta pasaheronan na waf pa hiba beach bin bek ta wordo cuestiona masha dor di taxistanan, cu ta considera e trabou ey di nan.
