“Kidpreneur$ with BIG Ideas” na Tra’i Merdia durante aña escolar 2023 ta continua. E topico cu ta treciendo dilanti ta Agricultura hunto cu Departamento di Agricultura, Cria y Pesca Santa Rosa y IDEA (Iniciativa pa Desaroyo di Empresa Arubano) cu ta pertenece na Departamento di Asuntonan Economico.
E contenido di e proyecto na Tra’i Merdia lo ta entre otro con pa traha un plan di negoshi, SDG’s, agricultura, musica/ drama, carchi creativo, innovacion, presentacion di plan di negoshi y entregamento di certificado. Actualmente tin 769 muchanan for di kleuter te cu 6 de klas cu ta bishitando e 7 Tra’i Merdianan. Di e cantidad aki tin 221 muchanan den klas 5 y 6.
E proyecto aki lo ofrece e muchanan educacion empresarial y lo yuda nan reconoce oportunidad comercial. E lo siña e muchanan con pa gana placa ya for di un edad hopi jong usando nan mesun creatividad p’asina stimula nan mesun negoshi den futuro.
E proyecto aki lo enfoca su mes riba e muchanan di 5de y 6de klas cu ta bishitando Tra’i Merdia. E duracion lo ta mas o menos un aña cu a duna inicio na luna di september 2022 te mei/juni 2023 y lo ta presenta na 7 Tra’i Merdia.
E duracion di e programa na cada Tra’i Merdia lo ta 4 siman. Cada Tra’i Merdia lo bishita un total di 8 biaha, di cual cada biaha lo tin otro facilitado cu lo entrena e muchanan.
Dialuna ultimo a toca turno pa IDEA conhuntamente cu Santa Rosa bisita e Tra’i Merdia na Prinses Amalia Basisschool. Aki un biaha mas a duna presentacion di plantamento basico na e muchanan di parti di Ludwig Rasmijn di Santa Rosa. Despues cu a guianan via di un presentacion ta sigui cu practica con mester planta un simia den un pochi. E simia cu a planta p’e alumnonan ta simia di Boonchi di Cunucu. Pakico Boonchi di Cunucu? Pa motibo cu e ta un di e beduranan cu ta nace mas lihe. Kiermen su periodo di crecemento ta den 3 pa 4 dia y ta esaki e muchanan ta desea di mira cu e mata ta sali den corto tempo.
E plantamento tin su tarea tambe cu ne caminda e muchanan ta bay cas cu locual a planta p’asina nan por muha y cuida e mata. Nan tin e opcion di sea ta transplanta e mata den un pochi mas grandi na momento di su crecemento of ta pone den tera y cuid’e te ora cu nan por haya cosecha.
Ainda falta algun Tra’i Merdia pa bishita esaki ta mas den e lunanan venidero cual lo sigui cu e mesun idea p’e muchanan.
