Minister Dennis Wiersma a entrega su retiro. Asina el a informa den un comunicado publica riba Twitter. “Cu dolor na mi curason, mi ta retira for di mi funcion como Minister di Enseñansa. Mi kier gradici tur e personana di bon curason cu mi a siña conoce den e ultimo temponan.”
Wiersma, di VVD den e ultimo lunanan tabata den luz negativo pa su conducta agresivo, manera atakenan di rabia y su mal comportacion. E Minister di Enseñansa a admiti cu tin biaha e ta demasiado skerpi, cu reaccion demasiado exagera y demasiado exigente pa cu su trahadonan. Como miembro di Tweede Kamer tambe e tabata tin un actitud antipatico y ofensivo contra di e trahadonan di VVD. El a priminti di drecha su comportamento y un biaha mas a pidi despensa den e congreso di VVD cu a tuma luga na comienso di luna.
Pero den e ultimo dianan a bin mas keho contra di dje. Den un simposio tocante 25 aña di formacion practico e lo a intimida dos persona tanto oral- como fisicamente. Despues di esaki el a dicidi di tuma su retiro.
Riba Twitter el a comparti un carta den cual e ta clarifica su decision:
“Cu dolor na mi curason, mi ta entrega mi renuncia como Minister di Educacion. Mi kier gradici tur e personanan simpatico cu mi a siña conoce den e ultimo temponan aki, inmensamente. E motibo dicon, mi ta splica aki bou.
E ta admiti cu e sa ta “demasiado skerpi.” P’e ta dificil pa acepta ora nan bis’e cu no por. “E ora mi ta sigui pusha, hopi biaha tambe na un manera demasiado skerpi. Den e carta ta mustra claramente cu e no ta reconoce su mes den tur e storianan negativo den e medionan di comunicacion, pero asina mes e ta entrega su renuncia. “Mi a ripara cu den mi trabou mi ta den un situacion cu no ta importa mas kico a pasa y kico tabata tono y intencion.”
Wiersma a bisa cu e tabata asina skerpi den asuntonan cu tin di haber cu enseñansa pa por trece cambio. “Tin ora bo mester pusha un tiki mas y bati riba portanan cu niun hende a durf di bati.”
Prome Minsiter Rutte a bisa di ta lamenta profundamente e retiro di e minister di VVD. “Gobierno ta perde un persona cu a lucha cu alma y curason pa enseñansa. P’esey mi ta gradicido na dje.
E otro Minister di Educacion, Robbert Dijkgraaf a gradici Wiersma riba Twitter y a describie como un “bon colega.” “Mi lo haya bo falta,” segun Dijkgraaf.
