Hopi hende ta cuestiona kico por a sosode cu, na ultimo momento, diripiente abogado mr. Ronnie Wix a dicidi di no acepta e puesto di Minister Plenipotenciario di Aruba na Merca. Ta un puesto honorabel den cual bo ta representa bo pais na e nivel mas halto di gobernacion Mericano. Rumornan cu e lo no a pasa e screening no ta cuadra cu berdad, pasobra fuentenan yega na e proceso a sigura cu si el a pas’e. Ta djis cu pa motibo di cambionan abrupto den su bufete di abogacia a pone cu e no ta sinti cu awor ta momento pa e lanta bay sin mas.
Screening riguroso
Pa por bira Minister Plenipotenciario di Aruba na Merca, ta encera cu lo traha na Embahada di Reino Hulandes na Washington DC, specificamente pa Ministerio di Relacionnan Exterior. Lo bo raporta na e Embahador di Reino Hulandes pa Merca y lo sali na defensa y interes di Aruba. Door cu lo bo tin acceso na hopi informacion y datos, ta nifica cu Aruba ta screen bo, Hulanda ta screen bo y Merca ta screen bo tambe! Como un diplomatico pa Reino Hulandes na Merca, bo mester pasa door di e “NATO level 1 screening”.
Screening ta dura seis luna
E tipo di screening pa por traha na un embahada na Merca ta rekeri un nivel halto di screening pa por duna bo “clearance” pa traha riba teritorio Mericano. E proceso pa screen un persona asina, cu lo asumi un funcion manera di un diplomatico den un embahada, ta dura mas o menos seis luna. North Atlantic Treaty Organization (NATO) ta esun cu ta determina e nivel di screening, mara na cada puesto. Den caso di level 1 ta referi na TOP SECRET y como tal nan ta investiga si e persona por maneha informacion confidencial di estado sin cu mester teme cu su lenga por los.
Minister actual mester bay
Gobierno di Hulanda no ta tene cuenta cu politica den e asunto di empleado na su embahada. Ta tanto tempo bo tin y mr. Joselin Croes no por keda mas. For di aña pasa caba e mester a bay, pero a alarga su estadia na e embahada door cu Aruba no tabata cla cu un candidato. Awo cu a warda tanto tempo pa e proceso di screening tuma luga, awo e candidato a nenga di tuma e funcion. Embahada como tal lo no por alarga e periodo di Joselin Croes mas, cu porcierto, ta candidato pa bira director di Cas di Aruba na Den Haag, Hulanda. Dos luna pasa Minister Presidente a confirma su candidatura, despues cu no a scog’e como director di Departamento di Relacionnan Exterior, unda tambe el a solicita. Remarcabel ta cu e funcion di Minister Plenipotenciario na Merca tabata na disposicion di partido POR, riba cual lista Croes a aparece den eleccion na 2017. El a bira Chief of Staff di Minister Andin Bikker desde november 2017 pa solamente 10 luna y na augustus 2018 el a asumi e funcion di Minister Plenipotenciario na Merca. Awo, despues cu e no a aparece riba ningun lista politico mas na 2021, e ta haya un funcion pero den gobierno di partido MEP.
Caribe Hulandes lo keda sin representacion
Mirando cu awor Partido RAIZ lo mester presenta un otro candidato pa mira si Gobierno di Hulanda y Gobierno di Merca ta acept’e, cu lo dura por lo menos seis luna mas prome cu Aruba lo por tin un representante na Washington. Consecuentemente, door di nos mesun tardamento, lo keda sin un Minister Plenipotenciario pa un tempo. No ta nada nobo na e Embahada di Reino Hulandes na Merca, pasobra actualmente Corsou ni Sint Maarten tin un Minister Plenipotenciario na Merca. E motibo no ta conoci, pero manera cos ta mustra awor, por lo pronto e islanan CAS lo depende riba e Embahador di Reino Hulandes na Merca pa e representa nos interesnan na Merca.
E funcion di Minister Plenipotenciario na Merca
Aunke cu e funcion mes no ta existi den nos leynan, ta yama e persona un GevMin, pero de facto, e lo traha pa Gobierno di Hulanda na Embahada di Reino Hulandes na Washington y lo atende asunto di Aruba. Pues no ta un ambtenaar di Aruba, no ta forma parti di Conseho di Minister y no ta responsabilisa na Parlamento di Aruba. Si e ta resorta bou di Minister Presidente. Den bida real, e GevMin ta atende cu inversionistanan interesa den nos pais, explora opcion pa desaroyo, traha riba e relacion cu Merca y ta e representante di Aruba pa ora ministernan biaha pa Merca pa trabou, etc. Aunke e funcion ta di un diplomatico, e GevMin di Aruba na Merca ta cay bou di e Embahador di Reino Hulandes na Merca, siendo e ambtenaar cu e funcion mas halto pa Reino Hulandes, riba teritorio Mericano.
