Diaranson ultimo (16 December) club di dam Arowak tawata tin su anochi di entrega di premio y clausura di aña 2020 den nan club na Nieuwstraat 11, Oranjestad.
A entrega trofeo na e prome 3 luganan di Campeonato Abierto di Aruba pa 2020, ganadonan di Christmas Rapid Dam tournament y entrega di certificado na Annelaine Jacobs. E campeonato abierto pa campeon di Aruba a wordo hunga den e periodo di 5 Februari pa 29 di Juli cu un break medio maart te cu Juni pa motibo di Covid-19. Campeonato a wordo hunga den un single round robin. Un total di 12 hungado a competi pa e prome luga. Campeon di dam pa aña 2020, a bira Rolin Croes. Rolin a score 19 punto, perdiendo un solo partido y tabla un solo partido.
Na di dos luga a termina Octavio Croes. Octavio a score 17 punto. (1 perdi, 3 tabla y 7 gana). Na tercer luga tawata tin un empate entre Annelaine Jacobs y Ricky Nisbet.Ambos a score 16 punto.(2 perdi, 2 empata y 7 gana). Despues di un playoff entre e 2 hungadonan aki, Annelaine a sali victorioso y a keda na tercer luga.
E mesun anochi, a tuma luga entrega di premio na e ganadonan di Christmas Rapid Dam. Christmas Rapid a wordo hunga den e periodo di 18 november pa 2 di december. Aki tambe a termina na prome lugar Rolin Croes cu 2 wega tabla y 7 gana. Na segundo luga a termina Delbert Alexander. Delbert a perde 1 wega y a tabla 1. Tercer luga a bay pa Mario Jansen.
E ganado y segundo luga di Christmas Rapid a ricibi un Christmas basket. Un tercer basket a wordo rifa entre e hungadonan cu no a gana un basket. Esaki a wordo gana door di Chester Berkel. Durante e anochi ey, a entrega na e atleta Annelaine Jacobs un
certificado cu su titulo di dam Female Master den Dam (titulo MFF).
Annelaine a logra e titulo cu su prestacion den seccion di damas na Corsou den december 2018.
Pa motibo di biahe, Annelaine mes no por tawata presente. Su mama a tuma e certificado pa Annelaine.
