Un patruya di Playa den e area di Paradera a topa cu un Hyundai Getz riba caminda dilanti Tinashi. Esaki tabata algo pasa di 4or di marduga. A duna e chauffeur señal pa para. A resulta cu ta cuater persona tabata sinta den e auto.
Dos di nan ta hende homber conoci pa Polis. E otro dosnan ta dos muhe. Ora e patruya di Playa a splica ki tur nan tabata bezig cune, mesora e patruya di Santa Cruz a cay aden y pidi pa confisca e auto. E Getz y algun di esnan den e auto tabata envolvi den un problema mas trempan na Casibari. E prome detencion tabata riba e homber D.K. conoci di Polis. E auto mes ta pertenece na un hende muhe biba na Picaron. E prome sospecho tabata e glas kibra y e wayanan di switch tur corta. Ta mustra un auto cu no tin yabi. A sospecha e momento ey cu e Getz por ta horta. Awor tur a keda deteni hiba warda y nan mester bay duna cuenta pa e caso na Casibari un rato prome. E auto Getz a keda confisca. Ora a hiba tur hende warda, a bay na adress cu e auto ta registra pa mira si ta topa cu e doño di e auto Getz A-40447.
Eynan a topa cu un persona cu a splica cu e doño di e auto mes ta biba na otro adress. Polisnan di Santa Cruz a bay na e adres. Banda di 5:30 di marduga e patruya di Santa Cruz a lanta e persona na e cas. A puntre riba e Hyundai Getz y el a splica cu e auto ta di dje. E auto a wordo horta na mesun adres durante oranan di marduga. A splica e persona kiko a sosode y con nan a haya e auto cu sospechosonan di Polis ta core cu e auto riba caminda. Polis a avisanan mesora pa mainta pasa na e departamento di Joyriding y asina entrega un keho oficial. Esaki tabata un accion hopi bon di e Polisnan di Playa conhuntamente cu esnan di Santa Cruz.
