“Awe mainta nos a firma e contrato pa haya e suma di 12 miyon florin di sosten di likidez for di Hulanda. Awe nos a ricibi tambe e 346 miyon florin pa cubri e fiansanan internacional cu mester refinancia den aña 2022. E ultimo aki a keda acorda na augustus 2021, cu Hulanda lo presta Aruba e fondonan necesario pa cubri e debenan internacional den aña 2021 y 2022”, asina Minister mr. Xiomara Maduro a informa awe.
Den reunion di Conseho di Minister di Reino di dia 25 februari ultimo, a aproba e peticion di Aruba pa ricibi sosten di likides. Conseho di Minister di Reino Hulandes a bay di acuerdo cu e conseho di College Aruba financieel toezicht (CAft) pa fia Aruba loke nos mester y no locual nos tabata kier of nos a pidi. Di e mas of menos 50 miyon florin cu a pidi na fiansa den e ‘tranche’ aki, Hulanda a acorda pa fia Aruba unicamente 12 miyon florin, cu ta un cuart di e suma solicita den e prome kwartaal di e aña aki!
Por mira cu nada cada tranche, Gobierno di Reino Hulandes ta cera e cranchi mas y ta haci e condicionnan pa sosten mas pisa. De facto, Aruba a firma e condicionnan di algun luna pasa caba, cu un promesa di lo cumpli. Awo ta ora pa demostra cu por cumpli cu locual a acorda y a firma na Den Haag. Hecho ta cu si no cumpli awo, lo no tin e siguiente tranche, cu lo bira un risico hopi serio cu empleadonan publico lo no cobra vakantie-uitkering, pasobra e suma ey lo mester sali for di e fiansa cu Hulanda mester haci na nos ainda.
Gabinete Wever-Croes a admiti cu inicialmente a haci peticion pa un suma mas halto. Sinembargo, na comienso di aña gobierno tabatin placa ainda riba cuenta di pais Aruba y Caft a conclui cu no tin mester di ful e suma. Pero, minister-president ta sigura cu e suma cu tabatin na comienso di aña riba cuenta di pais Aruba, tabata debi na atrasonan den pago di luna di december y no tabata placa destina pa januari. A trata na splica Caft, pero sin resultado. Ta mas cu obvio cu e nivel di confiansa di Gobierno Hulandes den maneho financiero di Gobierno di Aruba no ta mesun cos mas y no tin confiansa mas.
Di otro banda, Gobierno di Aruba a bisa di ta hopi satisfecho cu e suma aki, cu sin duda algun ta yuda den pago di e cuentanan pa e prome kwartaal pa 2022.
Awor ta cuminsa e trabounan pa peticion di sosten di likides pa e di dos kwartaal di e aña aki. Den reunion di Conseho di Minister di Reino awe mainta, ya caba a anticipa cu pa e di dos kwartaal Hulanda kier conseho di Caft riba algun otro punto, por ehempel:
- Cuanto di e placa di Loonsubsidie cu a paga di mas na comercio, a wordo cobra bek; aki na Aruba companianan a cobra 124 miyon florin di mas, di cual un parti a wordo paga caba, pero ainda falta pa cobra 113 miyon florin den comercio.
- Status di presupuesto 2022, a entreg’e na Parlamento e siman aki y ta spera cu prome cu e siguiente peticion di sosten di likides, ya a trat’e caba den Parlamento.
- Recortenan structural den gastonan di AZV, pues aki lo midi con efectivo AZV tabata y lo ta den e recorte di 60 miyon pa aña, pues 5 miyon florin pa luna.
- Con Aruba ta avansando den ehecucion di e Landspakket; pa cu esaki no ta premira problema, mirando cu Aruba ta den cumplimento cu e condicionnan, segun gobierno.
Probablemente lo pone un, mas of tur e puntonan aki como condicion pa e siguiente tranche di sosten di likides. E siguiente tranche ta hopi importante pasobra den e tranche ey tin e placa cu Gobierno ta presta pa por paga e mita vakantie uitkering na empleadonan publico.
Gobierno di Aruba ta bay traha riba esaki diligentemente y ta conta riba sosten y cooperacion di comunidad den esaki.
