Un delegacion chikito di Cruz Cora tabata na Aruba recientemente y nan a keda hopi preocupa pa e forma con ta atende cu e refugiadonan Venezolano. Personanan cu ta huy di Venezuela door di e situacion alarmante na e pais bisiña.
Cruz Cora ta preocupa pasobra e hendenan cu ta bini Aruba, of Corsou, huyendo di nan pais, y aki na Aruba ta bin haya nan mes den practicamente mesun situacion.
Ora cu e director di Cruz Cora di Hulanda a yega Aruba, a topa cu un situacion cu hopi Venezolano cu a pidi asilo politico, mas di mil peticion, pero esun mas preocupante ta e otro grupo cu ta huy di e pobresa, y no ta wordo persigui politicamente. Aki na Aruba, of Corsou, nan no ta haya trabou y si nan hay’e mes ta di forma scondi y e pago ta malo. E grupo aki no tin forma pa haya nan necesidadnan basico cu ta un luga di biba, cuminda y asistencia medico.
Esaki ta di dos biaha cu Cruz Cora ta bati alarma cerca Hulanda pa cu e situacion di e refugiadonan. Nan ta haya cu Hulanda mester saca un man pa yuda e hendenan aki y mester percura cu e situacion ta mes bon regla manera na Hulanda.
Hulanda e aña’ki despues di hopi critica a pone un suma di un poco mas cu 20 miyon euro pa ayudo na Corsou y Aruba pa atende cu e problemanan di refugiadonan Venezolano. Pero ta trata di un suma rond di 12 miyon florin.
Declaracion ayudo
E tempo ey Prome Minister a bisa cu: Aruba a ricibi e ayudo di Hulanda di 10.9 miyon florin, esaki debi na e situacion dificil na Venezuela y e impacto negativo cu esaki por tin riba nos pas. Mirando con preocupante e situacion di Venezuela ta y su impacto riba pais ta grandi y multiple riba diferente tereno. Riba tereno di inmigracion, infrastructura, enseñansa, social, siguridad y salubridad. Hulanda a bay di acuerdo pa pone un suma di 10.9 miyon pa por yuda Aruba, Boneiro y Corsou combati e efectonan di e crisis di Venezuela.
Prome Minister a enfatisa cu e placa aki no ta un prestamo cu Aruba lo mester paga bek. E ta un donacion/ayudo pa Aruba por maneha e situacion. “Esaki sigur ta un bunita gesto di Hulanda y ta muestra cu e crisis di Venezuela y impacto ta wordo reconoci eynan tambe” Premier Wever-Croes a duna di conoce e tempo ey.
E 10.9 miyon florin aki no ta placa pa Venezuela. E ta placa pa Aruba y tin di bay na e metanan specifico cu a wordo palabra cu Hulanda. Mas tanto e placa ta bay pa fortifica nos fronteranan y nos institutonan. Pa haci Aruba mas sigur pa asina atende cu e crisis miho posibel. E ta pa yuda Aruba controla nos fronteranan miho p’asina nos percura pa domina e crisis cu nos tin internamente.
E placa ta pa yuda tambe cu inmigracion y atende cu e fluho di persona mas agilmente. Lo yuda tambe cu e unidad di asilo. Na e momentonan ey e cantidad di peticion pa asilo ta na 1000 y Gobierno mester atende cu nan pa motibo di tratadonan internacional. Gobierno a pone 10 persona cu tawata den overtolligheidspool den e unidad di asilo y apesar cu nan ta haciendo un bon trabou, 1000 peticion ta keda hopi pa atende.
Guarda Nos Costa lo wordo fortifica. Control riba lama y tera lo bira mas estricto pa asina evita importacion ilegal di substancianan, arma como tambe di persona. E tema di mensenhandel y mensensmokkel (traficacion humano) ta un problema serio cu ta tumando luga demasiado hopi den nos region. Pa esaki lo inverti den ampliacion di Kustwacht, pa patruya nos awanan y asina evita importacion ilegal, y transporte ilegal di hende.
Lo bin mas cel na Polis y na KIA. Tambe cu parti di e placa aki lo amplia e capacidad di detencion na unda esnan ilegal por keda mientras nan ta warda e fecha cu nan wordo manda bek nan pais. Esaki den e tempo aki ta hopi importante y necesario mirando e fluho di ilegalidad na Aruba a aumenta.
Parti di e fondo aki lo wordo uza tambe pa enseñansa temporal, pa muchanan cu ta bin for di Venezuela cu no por drenta nos scolnan, pa garantisa cu nan ta haya educacion durante e tempo cu nan ta na Aruba. Asina evita cu nan ta bira un peso pa comunidad y evita mas problema social.
Pues por mira cu ta papia di alohamento solamente pa esnan cu ta deteni y no tin un luga unda nan por yega como refugiado y keda eynan.
Ta bon pa remarca si, cu e placa aki lo no ta disponibel pa crea vivienda of cubri otro gastonan di personanan cu ta bin haci peticion di asilo. Tampoco e placa por wordo uza pa cubri gastonan di operacion di Gobierno. E placa aki ta bay pa fortifica Aruba como pais, den haci Aruba mas fuerte y mas sigur, y asina por atende cu e crisis miho posibel. Te aki e declaracion di e tempo ey, haci den luna di september.
