Tur cos ta cuminsa cu nos confesion, palabra di Dios ta bisa den 1Juan 1;9 : Si nos confesa nos picanan E ta fiel y husto pa pordona nos, nos picanan y pa limpia nos di tur inhusticia.
E di dos stap pa nos restauracion ta ora nos pordona, otro mescos cu Dios a pordona nos.
Esey ta locual ta para scirbi den Mateo capitulo 6 :14+15, y ta demostra cu nos ta somete y obedece Dios su palabra. Tambe e ta demostra cu den nos curason tin un cambio, ya nos no ta biba pa nos mes, pero nos mente a wordo renoba, nos kier haci e boluntad di Dios.
Pasobra ora nos pordona un hende e prome cu ta haya su libertad ta nos mes, mientras cu nos no pordona, nos ta keda cana cu un carga riba nos lomba , un peso cu ta molestia nos spiritualmente y fisicamente, y hasta por causa daño na nos salud mental. Semper prome cu Dios haci algo nobo den nos bida, e ta restaura nos, pa asina locual ta bay cuminsa awor no trompica den cosnan di antes.(Isaias 43:18+19)
Pasobra ora bo ta bay sembra un cunuco nobo, bo mester kita tur yerba bieu, tur sumpiña, tur piedra, pa asina e tera ta bon pa sembra den dje, y bo tin sigur di un bon cosecha.
Di berdad, di berdad cu Dios kier haci esey, Dios no kier pa un famia ta kibra, separa, ningun hende sa di otro, tur ta biba pa nan cuenta, mayor no sa di yiu, y e yiu tampoco no sa di su mayor, esey ta plan di diabel no ta plan di Dios.
Nos Dios ta Dios di union, y no di division, Dios ta odia esnan cu ta sembra division entre rumannan. (Proverbionan 6:19). Caminda tin union eynan Dios ta derama su bendicion (Salmo 133:3).
E palabra di Dios ta splica bon cla con Dios a reconcilia e mundo cu Su mes, sin tuma nan picanan na cuenta.(2 Corintiona 5:19). Ta p’esey nos tin di reconoce cu den Cristo Hesus tur cos por wordo restaura den nos bida.
No lubida pa medio di Cristo nos relacion cu Dios a wordo drecha.( 2 Corintionan 5:17)
Cristo Hesus ta e imagen di Dios invisibel e primogenito di henter creacion.
Pa medio di dj’E tur cos a wordo crea, tanto den cielonan,como riba tera, visibel y invisibel, sea trono, dominio, gobernantenan of autoridadnan tur cos a wordo crea pa medio di dj’E y p’E, (Colosensenan 1:15+16).
Cristo Hesus ta restaura famia, hogar, matrimonio, relacion, bida, organisacion, pais, tur cos E por restaura, pasobra e a muri na cruz pa pordon di nos pica, salbacion di nos alma, y restauracion di nos bida, tanto, fisico, mental y spiritual.
Ta tempo pa nos stop di haci wega cu nos bida, y entrega nos mes na Dios, pasobra cada dia sin Cristo nos bida ta na peliger, pasobra nos adversario e diabel ta cana rond buscando ken e por devora, y ta solamente den Cristo nos por resisti.( Santiago4:7).
Si algo mester sosode den nos hogar of matrimonio, mas lihe nos drecha cu otro ta mihor pa asina evita cu e diabel ta cohe ventaha, pasobra nos no por ignora su trampanan.
Den Jeremias Capitulo 30: 17: Señor ta declara lo Mi restaura bo salud y lo Mi cura bo heridanan.
Cristo Hesus ta nos restaurado .
Sinceramente, Pastor Marcel Balootje.
