E wega cu ta wordo hunga cu combatimento contra illegalnan riba Aruba ta yegando na nivelnan halto. Esnan liga na gobierno ta haci yamadanan pa laga ilegalnan den libertad. E cosnan aki a cuminsa fada e personal di Guarda Nos Costa.
Nan ta den accion constant den diferente area di construccion entre otro. Pa nan sorpresa ora cu gara e diferente ilegalnan di diferente nacionalidad, diripente ta mira intentonan pa laga e hendenan den libertad. E intentonan aki ta sali for di bufete di abogado entre otro di esnan liga na gobernacion actual. Net den fin di siman a drenta e propiedad di Acqua Condominiums riba LG Smith Blvd. Ora Guarda Nos Costa a drenta e tereno a mira con ilegalnan a sali core pa tur banda.
A gewoon busca manera di huy y bula cura pa scapa. Asina mes a gara basta. Diferente nacionalidad entre otro Venezolano y Dominicano a keda gara y hiba Guarda Nos Costa. Tur tabata trahando den forma illegal. Entre 20 pa 25 a wordo gara. Nan no tin permiso di trabou. Parce a descubri algun cu un carta den nan poder pero sin stempel. Loke a capta atencion ta cu diripente ora cu a yega Guarda Nos Costa un conocido abogado yega na gobierno a yama y a cuminsa pone presion. E personal di Guarda Nos Costa no a sucumbi pa presion. Peor ainda ta ora un hefe a cana yega cu stempel pa asina stempel e carta di esnan illegal cu a wordo gara.
Ta parce cu kier a legaliza e hendenan aki a base di pone e stempel riba e carta cu nan ta cana rond cune. Finalmente tur intento no a concretiza pasobra esnan cu tabata trahando na Guarda Nos Costa a pone pia abou. Nan no a sucumbi pa corumpi cu e sistema pa libera e ilegalnan cu a wordo gara. Pesey mes den un rato di tempo a logra pa cuminsa deporta e ilegalnan. A deporta diasabra y diadomingo mayoria di e ilegalnan. Siman a habri y trempan dialuna a bolbe saca algun. Despues a resta como cinco cu mester a bay ainda e siman aki ainda. Na Aruba ta yena cu illegal y diferente inversionista a mira cu nan no tin e mesun suerte cu otronan. Mientras nan mester core caminda largo pa regla trahadornan den diferente area specializa, otronan ta pone ilegalnan traha y ora garanan, mesora for di nivel halto ta drenta yamadanan pa sea sacanan of purba sacanan. Hasta varios conoce e wega di sali dos dia for di e isla ora cu nan dianan di estadia yega y ta bolbe drenta y sigui traha sin permiso di trabou. Mientras cu e lucha di Guarda Nos Costa ta sigui, no por nenga e disgusto cu tey presente pa motibo di e intentonan pa libera ilegalnan.
