Dia 14 di novèmber ta e dia ku a keda dekretá komo Dia Mundial di Diabétis. Den boka di pueblo e ta mihó konosí komo e malesa di suku. E aña aki e tema prinsipal ta “Access to Diabetes Care – If Not Now, When?”, esta aksesibilidat na kuido di diabétis– Awor ta e ora.
Sokudi ta para pa Sosiedat Kurasoleño di Diabétis; durante di hinter aña ta tene aktividatnan di informashon i rekreashon pa su miembronan. Sokudi ta traha na prevenshon, informashon i formashon di personanan ku ta kore riesgo di haña e malesa di diabétis i tambe esnan ku a ser diagnostiká ku e malesa.
Afortunadamente Kòrsou su sistema di kuido ta hasi posibel ku personanan ku diabétis ta risibí e kuido ku nan tin mester. Pa Sokudi disponibilidat di informashon tokante e malesa i tur su atributonan, tambe ta parti di aksesibilidat di kuido. Por nota ku den diferente kaso si un persona lo a risibí informashon tokante e riesgonan i tambe kon pa mantené un bida saludabel e por evitá ku e ta ser diagnostiká ku e malesa òf mitigá esaki su efektonan.
Resientemente Sokudi a tene su reunion general anual, kaminda kambio di direktiva a tuma lugá. Presidente elekto di Sokudi sra. Sluis i su team ta kere ku nos komunidat mester ta konsiente di e ríesgo ku e Kurasoleño ta kore di por haña e malesa aki. Den e kuadro aki i pa e próksimo temporada Sokudi lo profundisa su enfoke riba programanan di informashon i prevenshon ku ta dirigí riba esnan mas chikí den nos komunidat ya asina for di un edat hóben nos komunidat ta konsiente ku entre otro un estilo di bida saludabel ta hasi e chèns di haña e malesa mas chikí.
Direktiva di Sokudi ta invitá tur ku ta interesá pa risibí mas informashon tokante e organisashon òf e malesa di diabétis pa tuma kontakto ku nos via nos medionan sosial òf number di telefon 888-8844
