Na aña 2018, ora cu a huramenta Ivan Duque Marquez como presidente di Colombia, tabata minister-president di Corsou, e tempo ey Eugene Rhuggenaath cu a representa Reino Hulandes na e ocasion ey. Den fin di siman, a bolbe toca turno na Corsou, e biaha aki minister-president Pik Pisas, pa representa Reino Hulandes na ocasion di e ceremonia di huramentacion di Gustavo Petro Urrego como presidente di Colombia.
Huramentacion
“Juro a Dios y prometo al pueblo cumplir fielmente la Constitución y las leyes de Colombia”, asina Gustavo Petro a hura awe como e di 42 presidente di Colombia. El a bira e prome presidente “izquierdista” di Colombia, pais di casi 50 miyon habitante. El a priminti den campaña di ehecuta su plannan profundo di reforma den e pais, cu actualmente ta enfrenta desigualdad economico y cu hopi violencia di gruponan di narcotrafico.
Caminda largo di 32 aña
Ta bon pa menciona cu e caminda pa a logra bira Presidente di Colombia a inicia despues cu su grupo di guerilla, M-19, a baha nan armanan na aña 1990. Desde e tempo ey Petro a logra bira parlamentario na dos ocasion, a bira alcalde di Bogota y a core pa presidente cuater aña pasa caba pero Duque a gan’e e tempo ey.
Eleccion 2022
Cu a huramenta Gustavo Francisco Petro Urrego como Presidente di Colombia ta bin despues di eleccion presidencial cu a tuma luga e ultimo lunanan aki na e pais productor di koffie. E eleccion a bay dos buelta y den e di dos buelta Petro a gana e ingeniero Rodolfo Hernández. E resultado tabata cerca di otro. E formula presidencial conforma door di Petro y Márquez como vice-presidente a logra obtene 50.44% di e votonan na Colombia, mientras cu Hernandez a logra 47,31% di e votonan.
