Gobierno di Corsou a dicidi di bisa SI na e ayudo financiero cu Hulanda ta ofrece den cuadro di e consecuencianan cu e pais ta pasando aden door di e crisis di coronavirus. Sinembargo, henter e tema aki mester haya aprobacion di Parlamento ainda.
Hulanda ta ofrece Corsou, mescos cu Aruba, ayudo pa cubri e deficit financiero di presupuesto. E suma necesario pa Aruba ta pasa 1 biyon florin. Sinembargo e placa aki Hulanda no kier regala e islanan, sin cu nan tin control. “Nos niun kier colonisa e islanan. Nos no ta interesa den esey.
Pero si nos kier vigila cu ta uza e placa debidamente y cu ta haci reformanan pa e islanan no sigui haya nan mes den problema. Yega na un punto unda cu nan por bisa cu nan ta para di berdad riba nan mesun pianan,” esaki Secretario di Estado pa Asuntonan di Relacionnan di Reino Raymond Knops a bisa den Tweede Kamer ora cu a trata e presupuesto pa ayudo. No solamente Knops, pero diferente miembro a expresa di kier y tin e placa pa yuda e islanan, pero cu mester controla e forma con ta uza e placa.
Pa e motibo ariba menciona a propone inicialmente e Caribische Hervormings Entiteit (CHE) pero cu despues a cambia pa Orgaan voor Hervorming en Ontwikkeling (OHO). No ta conoci, of no a menciona si tin algo cu a cambia den e condicionnan pa cual inicialmente Gobierno di Rhuggenaath no a bay di acuerdo cu e ayudo.
E ayudo ta bini cu ne un tipo di vigilancia di OHO pa un periodo do seis (6) aña y cu un evaluacion despues di tres aña.
Di Aruba no a haya nada ainda cu tin avance den e combersacionnan. Prome Minister Wever Croes ta riba un vakantie cortico cu su famia y mr. Andin Bikker ta liderando e Gobierno na e momentonan aki.
