Hopi ta esnan cu na ultimo momento ainda tabata haci nan esfuerso pa paga nan belasting riba auto na tempo. Manera custumber tambe, hopi ta laga esaki te fin di luna pero no ta tur biaha ta logra.
Departamento di Impuesto (DIMP) di su banda a pone algun dia adicional pa asina brinda servicio extra na e pueblo cu tin cu paga number di auto ainda prome cu nan haya boet. Algun a haci uso di e dianan aki y algun a opta pa bin “Last Minute’ y como tal el a bira un caos.
Diabierna atardi na momento cu ora a yega pa cera porta, hopi ta esnan cu a keda pafo / of a bay bin bek y no por a drenta mas y hopi ta esnan cu a keda paden for di oranan tempran di mainta. Na momento cu situacion a bira un poco tenso a pidi presencia di polis pa duna un man na e publico cu no por a compronde cu no por atende ningun hende mas. Na momento cu polis tabata na sitio por a compronde cu paden ainda tabata tin 150 hende pa atende.
Pa locual ta esnan cu no a logra mas diabierna, lo tin cu presenta dialuna y prepara pa e boet cu lo tin cu bay paga adicional. Sigur cu no tabata tin caranan contento.
