No laga ningun hende ni tampoco ningun situacion ki ta bo paz. Pero pone tur cos den man di Dios y sigui bay dilanti. Confia Dios den tur cos pasobra e ta Dios y e tin e mundo den su man, pero pordona y lubida pasobra tin un aña nobo y precioso bo dilanti. Pero si bo curason ta amarga y pega den tempo, kico hende a bisa of laga di bisa, bo no por scucha locual Dios tin pa bo. Pasobra falta di pordon ta limita hende su comunicacion cu Dios.
Y t’esey ta locual e enemigo kier, pa bo ta rabia of pega den envidia, orguyo y odio, bibando den scuridad. T’esey ta e berdadero fucu, ora bo habri aña ta papia riba mesun cos di aña pasa y bo no ta realisa cu ta aña nobo y Dios ta treciendo cosnan nobo.
Nos ta conseha tur famia pa cera aña den oracion y habri aña den oracion, mas uni posibel. Laga tur hende ta den cas y no riba caya, pasobra e aña cu ta bin nos mester ta uni den Cristo pa nos por resisti tur tipo di atake cu por bin riba famia.
Ta p’esey bo no por tin otro na bo curason. No por tin hende cu ta biba hunto y cu ta malo cu otro. Mester drecha e asunto prome cu aña caba y bendiciona otro di berdad p’asina bendicion di Dios reina den cas.
CONSEHO:
Laga pasado bay pa Dios por habri porta pa futuro.
Pa bo herida cura bo mester stop di mishi cu ne.
Ora bo laga los of pordona of stop di pretende riba algo of kibra cu un capricho, bo ta demostra cu bo tin control riba bo mes y cu otro hende no tin dominio riba bo.
Proverbionan 4:25: “Laga bo wowo wak recht bo dilanti. Laga bo klep di wowo keda fiha straight bo dilanti.
Proverbio 2:7 y 9: “E ta warda sano pa esunnan cu ta recto. E ta un escudo pa esunnan cu ta cana den integridad.
1 Pedro 5:7: “Tirando tur boso preocupacion riba djE pasobra E ta percura pa boso.
Proverbio 3:5: “Confia den Señor cu henter bo curason y no depende riba bo mes comprendemento.
Confia den djE na tur tempo Oh pueblo, drama boso curason Su dilanti. Dios ta un refugio pa nos.”
Ta imposibel sirbi Dios cu odio den bo curason. Prome cu bo yuna, corda pordona. Pasobra Dios ta bisa cu si nos no pordona otro Dios tampoco ta pordona nos nos transgrecionnan.
Ta ora pa nos arepenti di nos foutnan y laga cos bieu bay, p’asina nos por acerca e trono di gracia di Dios cu confiansa pa asina nos por ricibi pronto auxilio y ayudo na tempo.
Den tur famia pordon ta sumamente necesario, pa evita division, pero tambe esey ta identifica cu nos tin Cristo na prome luga den nos bida.
Acepta e consehonan aki. Nos ta confia Dios di por sirbi bo.
