E conseho di Raad van State, riba un proposicion di ley di e miembro di Tweede Kamer, Andre Bosman, ta cla. Bosman di VVD a bini cu un proposiciondi ley cu ta haci mas facil pa Corsou, Aruba y Sint Maarten bandona Reino Hulandes.
Esaki , publica riba www.koninkrijksrelaties.nu, ta keda na e iniciador di e ley, Andre Bosman, pa haci publico contenido di e conseho aki.
E miembro di VVD ta propone pa kita e obstaculonan cu tin den Statuut cu ta stroba e islanan di bandona Reino Hulanes. E kier pa kita for di Statuut e herment di referendum. Tambe e kier pa elimina e exigencia cu e salida di e islanan mester haya aprobacion di dos tercera parti di e miembronan di Tweede Kamer.
E articulo ta menciona cu pa motibo cu ta trata di un Rikswet, e Parlamentonan di orsou, Aruba y Sint Maarten tambe lo mester por duna nan opinion riba esaki, y si ta desea esaki, participa den un debate riba e tema den Tweede Kamer.
E aprobacion di e ley – cu ta algo cu solamente Tweede y Eerste Kamer por vota riba dje- riba su mes no ta nifica mucho. Pa un cambio den e Statuut si mester haya aprobacion di e otro paisnan di Reino y pa esaki tin poco entusiasmo pa e ideanan di Bosman.
Cu e proposicion di ley aki, e politico di VVD kier regla cu Boneiro, St. Estatius y Saba ta wordo hinca bek den Statuut pa duna nan e derecho bek riba e opcion pa sali di e Constelacion di Reino Hulandes. Pa esaki no solamente mester di adaptacion di e Statuut pero tambe di Constitucion.
