Recientemente e seleccion di Aruba Karate Bond hunto cu algun karateka miembro tabata tin e honor di participa na un tremendo karatecamp di Curaçao Karate Bond (CuKarBo). Ta referi kinan na e atletanan di seleccion Janilaine Bello, Alejandro Gonzalez Lujan y Juan David Velasquez, kendenan a wordo acompaña pa Cristopher Garcia Velez (Dojo Gyoseki Kan), Janrick Bello (Shotokai dojo Shocokan) y Alakina Gonzalez Lujan (Shotokai dojo Shocokan).
E grupo di Aruba a topa e karatekanan di Corsow na e tereno di campamento Brakkeput Ariba. E campamento mes tabata uno masha great cu un programa bastante varia. E enfoke primordial tabata e tecnicanan di ‘kumite’ (bringamento) pero a pone hopi atencion tambe na e enseñanza di e reglanan di World Karate Federation y nutricion pa atletanan di halto rendimento. Meta di e campamento tabata pa Aruba comparti, conoce y haya mas experiencia pa medio di ‘fogeo’. Segun e headcoach di Aruba Karate Bond, esta ‘sensei’ Alberto Gonzalez, e karatecamp aki tabata un experiencia hopi educativo. No solamente a aplica un programa yen di diferente tecnica di pelea pero a percura tambe pa e participantenan siña liderazgo y trahamento den grupo.
Aruba Karate Bond bou presidencia di ‘sensei’ Feliz Tromp ta contento cu e participacion di e seleccion. Ta gradici Curaçao Karate Bond pa e invitacion y tremendo programa, specialmente ‘sensei’ William Millerson y ‘sensei’ Ivonne Leito Senff kendenan constantemente tabata pendiente di tur loke Aruba tabata tin mester. Un danki special ta bay tambe pa e apoyo di Stichting Sportsubsidie Aruba, Lotto pa Deporte, Comite Olimpico Aruba y tur e mayornan di e karatekanan. Pabien cu boso participacion.
