Den e fin di siman aki, esta diadomingo awo, agrupacion ORUBA lo presenta nan concierto yama Totumba. Esaki lo tuma luga pa 3:00 y 7:00 pm den e sala grandi di Cas di Cultura.
Segun e conocido musico Reno Steba durante di e concierto aki nan lo presenta nan EP y singlenan cu a realisa prome y durante e temporada di COVID, concepto cu Steba a bin ta traha fo’i Hulanda, cual ta uza e mescla di nos ritmonan local compaña cu harmonia di fusion, canta na Papiamento cu letranan comico di sucesonan cu ta pasa den bida.
ORUBA ta consisti di entre otro, fuera di Reno Steba mes, di Jeremy Bonarriba, Serghio Jansen, Jaderick Croes, Papito Raphael, Arthur Kelly, Johnny Scharbaai y Hubert Thiel. E show lo estrena coreografia di baile di Oruba Dancers cu Marcie de Jongh, Thayisa Farro y Charlotte Lisere.
No warda pa busca bo carchinan cerca un di e integrantenan of na Cas di Cultura. Totumba ta un continuacion di Music Exposure, Cas di Cultura su iniciativa pa pone e musiconan local riba su escenario, exponiendo talento y treciendo entretenimento di calidad.
Publico por spera un show varia cu ta rico den ritmo, baile y e aspecto visual cu varios composicion nobo y original, netamente traha pa nos musiconan, lidera bao di Reno Steba mes.
