Den e periodo di crisis causa pa Covid-19, e companianan di seguro a logra wanta e sla. Segun Jacques van der Scheer (Guardian Group) a splica, esaki ta pasobra tin instancianan concerni cu semper ta controla e sector aki.
Banco Central ta e instancia cu ta controla cu tur e companianan di seguro ta solvente, tin suficiente likides pa cumpli cu su clientenan. P’esey clientenan por ta trankil cu si cualkier cos pasa cu nan, e companianan por cumpli cu e polisanan cu nan a bende.
Esaki ta e mesun opinion di Randall Croes, di e compania Sagicor. Den e relatonan anual di Banco Central,el a splica, por mira tur e detayenan. Y a sigura cu e seguro di bida ta sigui mescos, e no ta depende di pandemia of no. Cualkier persona cu tin un seguro di bida y e fayece, nan lo cumpli cu pago. E no ta depende si a fayece di Covid-19 of no.
Apesar di e situacion di solidez, e ta keda un ehercicio diario cu mester colabora cu nan clientenan, principalmente esnan cu nan entradanan ta depende di sector turistico cu ta completamente cera awo, Angeline Tromp Zievinger di Citizens a comenta. No por presiona pa pago, si nan no tin entrada pa cumpli cu e prima.
Si cualkier cos, por tuma contacto cu compania di seguro pa yega na un areglo di pago.