Tamara Croes, presidente di e Comision di Mayornan di Colegio Arubano, a splica cu nan campaña tin como meta pa e bienestar di Colegio Arubano, su studiantenan y e docentenan.
Sra. Croes ta representa e directiva cu recientemente a keda eligi y a presenta nan mes siman apsa na e directiva di Stichting Voortgezet Onderwijs Aruba (SVOA cu antes tabata SMOA). Nan a bin ta siguiendo tur e desaroyo na Colegio Arubano, un situacion andando pa algun luna caba y cu te ainda no ta mira cu tin un solucion na caminda.
Pa trata di yega na un solucion, a haci un apelacion na mayornan pa no haci e pago di Boekenfonds, pa di e forma aki pa pone presion riba e directiva pa duna e claridad cu tur partido kier. Con ta maneha e Boekenfonds ta loke aworaki nan no tin claridad riba esaki. P’esey a pidi mayornan pa no haci pago di e Boekenfonds ainda.
E comision di mayornan (OCA) a compronde e preocupacion di mayornan riba e asunto di studiereis cu nan mester haya cierto placa bek, mirando cu nan yiunan no ta biahando mas. Nan kier transparencia con a maneha e placa. Asina por ehempel mayornan di muchanan di VWO 4 y 5 a bay scol y firma un documento di e suma cu nan a haya bek pero cu no mag tin obheccion despues di esaki mas. Awo nan kier transparencia di loke a haci cu resto di e placa.
OCA a tende cu KLM a duna voucher pa tur e ticketnan reserva, pues pa uza otro aña. Si esaki ta e caso tambe cu mayornan di studiantenan di HAVO 4 cu tabatin reservacion na Avianca y COPA, nan no sa pasobra no a haya informacion di e banda ey. Mirando cu tin e voucher pa e ticketnan di otro aña, mayornan kier e placa di e ticketnan di e aña cu a caba bek.
Aunke cu e comision a presenta nan mes na SMOA /SVOA, no a papia cu nan ainda riba e problema pasobra kier pa e diferente di opinion entre SMOA / SVOA y Obispado keda soluciona. Tambe nan ta pendiente pa un reunion cu Obispado. Nan meta, segun Croes, ta pa yega na un miho ambiente, kita e sentimento negativo cu por sinti bou di tur esnan na Colegio Arubano.
