Pa siguransa corte a destrui decision tuma pa Minister Glenbert Croes na september aña pasa. Jacqueline Harewood a representa su mes den corte y a gana un caso contra gobierno. E ta un funcionario na DIMAS, na e Departamento di Asilo y a mand’e cas pa investigacion. Aunke cu e orden a vence y e por a bay traha, no a destrui esaki. Esey ta loke el a pidi corte.
Tabata dia 14 di september di aña pasa, cu a mand’e cas y a prohibie entrada na tur oficina, edificio, tereno, auto y e aspectonan digital di Departamento di Integracion, Maneho y Admision di Stranhero (DIMAS) pa un periodo di seis siman. El a bay contra e decision aki y a entrega un obhecion dia 20 di september di aña 2022. A trata e obhecion aki dia 8 di mei ultimo unda cu el a representa su mes den e caso aki. Harewood ta traha den e funcion di beleidsmedewerker seccion di Asilo di DIMAS.
A prohibie entrada na interes di un investigacion riba e forma di traha den e seccion di peticion di asilo. A bisa cu lo pone e investigacion den man di un comision, apunta door di Conseho di Minister y bou guia di Seguridad Nacional. Nan a bis’e cu pa e investigacion y integridad di
DIMAS, e lo no por haci su tareanan temporalmente. E minister encarga a bisa cu mester declara su peticion inadmisibel pa motibo cu desde e sentencia di dia 17 di october di aña 2022, el a reanuda su trabou. E no tin motibo mas pa pidi un decision riba e medida tuma ya cu e periodo di seis siman, cu a impone e prohibicion, a pasa caba.
For di e documentonan cu corte a ricibi, a constata cu ora e periodo a vence, pues den luna di october, Harewood a reanuda su trabou.
A pesar di esey, corte ta conclui cu e tin interes den e proceso aki cu ta obheccion riba e decision tuma na september aña 2022. A tuma como ehempel, un veredicto di 5 di januari di aña 2022. E veredicto ey ta bisa: “een toegangsontzegging een inbreuk maakt op de aan
klaagsters functie verbonden aanspraak op het kunnen verrichten van haar werkzaamheden. De rechtmatigheid van die inbreuk kan worden onderworpen aan het oordeel van de ambtenarenrechter. De enkele omstandigheid dat aan die inbreuk een einde is gekomen, doet
het processueel belang van klaagster bij een oordeel over de rechtmatigheid van de bestreden beschikking niet verloren gaan.” Pues a pesar cu el a bay traha, e tin derecho di haya e pensamento di hues riba su caso.
Durante e audiencia den corte, e hurista y abogado di Minister Glenbert Croes, a duna di conoce cu e intencion ta pa hala e decision aki aden pa falta di motivacion den esaki. Tabatin e punto di bista cu schorsing di e decision, den e sentencia uza como ehempel, no ta nifica cu e prohibicion di entrada ta ilegal.
No tabata sigur cu e minister lo keda sin haci nada mas cu retiro di e decision cuestiona, of lo busca un otro motivacion pa e yega na un otro prohibicion di entrada. Loke ta sigur ta cu no lo mantene ni uza e splicacion duna pa a tuma e decision na september. Pa e motibo aki so e decision ey di september no tin pia pa para riba. P’esey e obhecion ta na su luga y corte a destrui esaki.
