For di maart cu coronavirus a surgi na Aruba, Colegio Aruba a bin ta trahando estrechamente cu Departamento di Salud Publico (DVG).
Hustamente den contacto cu e departamento aki y Departamento di Enseñansa cada biaha ta tuma decisionnan ora cu ta necesario. Asina por ehempel, a haci ora cu a cuminsa duna les online pa despues poco-poco bay den e sistema tradicional bek te cu a yega na 100% di asistencia.
Den e momentonan ey, a surgi algun caso di studiantenan y docentenan cu a test positivo pa COVID-19. Mesora a bay bek den contacto cu autoridadnan di salud y enseñansa. Di e forma aki a yega na e decision cu no tin necesidad pa cera henter e scol. A dicidi pa cera e scol solamente pa un dia, segun rector Tim Croes a splica.
A haci uzo di e dia ey pa desinfecto henter e compleho educativo y despues lesnan lo sigui normal. Tur esnan cu ta sinti malo, a haci apelacion na nan pa tuma contacto cu nan dokter di cas.
Croes a splica cu e instituto ta conta cu 1541 studiante y e ta un reto tur pa duna les 100% cu e cantidad di e alumnonan aki. Sinembargo ta hayando bon cooperacion di studiantenan, kendenan ta desinfecta cada banki y stoel cu nan haci uzo di dje.
Den henter e periodo di COVID-19, di maart pa awo, a conta cu alrededor di 15 caso. Y por bisa, segun Croes, cu tur tabata contagionan pafo di scol.
