Diasabra ultimo, Colegio EPI, cu por cierto e aña aki ta celebrando su 25 aña di existencia, a tene nan eleccion di reina.
Den e categoria Sra. Carnaval (Categoria Docente), Geraldine Albertsz a resulta e ganado pa asina representa su scol den e eleccion di Sra. Carnaval. Door cu e aña aki, EPI ta celebrando su 25 aña di existencia, Albertsz a dicidi di tira su mes den e aventura cu yama eleccion di reina. Y dialuna el a bay inscribi pa Sra. Carnaval.
El a acerca algun studiante pa asina nan participa y esakinan na nan turno a curasha Albertsz p’e tambe participa. E eleccion a bay super bon, unda cu el a bay cu e titulo di Best Speech, Popular y Queen Social Media.
Awo e preparacionnan pa eleccion di Sra. Carnaval, ta den ful swing. El a enfatisa cu den e eleccion di Sra. Carnaval e lo no bay representa solamente Colegio EPI, pero tambe tur e docente- y trahadonan den enseñansa.
Tur alumno- y ex-alumnonan pa baha bin pa Plaza Betico Croes pa asina apoya e reinanan cu lo ta representando nan respectivo organisacion y/o scolnan.
REINA HUBENIL
E aña aki tambe Colegio EPI lo manda un representante pa Reina Hubenil, den persona di Jennely Winklaar.
Jennely a conta cu semper e tabata kier a competi den eleccion di reina di scol, cual nunca el a logra, pero e aña aki cu e oportunidad a presenta, e no tabata kier a laga esaki bay sin mas.
E preparacionnan ta bayendo hopi bon, aunke si e ta sintie hopi nervioso. Pero el a sigura di haci su maximo esfuerso pa asina duna lo miho di su mes y pa tambe bin cu e corona pa su scol.
