Un deportista preocupa ta haci un apelacion na tur cu ta participa den trafico pa tene consideracion y cuidou ora nan topa cu ciclistanan riba caminda. E ciclista aki a hay’e confronta cu un susto inmenso cu por a cost’e su bida. Cu un solo pregunta na e auto A-41804, pakico?
Incidente aki a tuma luga awe diadomingo marduga pa 5:30 am na altura di rotonde di Ponton. E auto en cuestion no a respeta e ciclista biniendo riba Watty Vos Boulevard cu casi por tabata un tragedia. E ciclista a conta cu ta danki na Dios cu nada no a pasa y cu el a resulta ileso.
Den su propio palabranan e ciclista ta comparti lo siguiente: “Na chauffuer di auto A-41804; Mi tin 29 aña, mi ta un atleta, mi tin hopi soño cu mi kier realisa, mi tin dos cacho cu ta depende di mi, mi tin hende ta warda mi yega cas safe, mi kier sali train y yega mi cas safe, mi tin un futuro. PLEASE no pone mi bida of di cualkier otro ciclista na peliger”.
Esaki ta locual un atleta ta pidi y ta anhela di tur cu ta topa cu nan riba caretera, pa respeta y comparti e caminda cu otro. Tanbe ta haci un apelacion na tur otro atleta pa comparti nan experiencia pa por educa y conscientisa nos comunidad, pero igualmente nos mandatarionan pa por tuma accion y haci lo necesario pa cu e situacion aki.
